Hemsereka Dayîreyê Têkîlîyanê Teberî ya Rayberîya Xosere Îlham Ehmed dîyar kerd ke seba heme dîyalogan xetê sûrî yê Rayberîya Xosere est ê û bale ant detayanê mabênê Rayberîya Xosere û îqtîdarê Şamî ser o. Îlham Ehmed sûrîyeyîjan çi paweno, eşkera kerd.
Hemsereka Dayîreyê Têkîlîyanê Teberî ya Rayberîya Xosere ya Demokratîke ya Herêma Vakûr û Rojhilatê Sûrîyeyî Îlham Ehmed dîyar kerd ke seba heme dayîş û girewtişî û dîyalogî xetê sûrî yê Rayberîya Xosere est ê û detayê dîyalogê mabênê Rayberîya Xosere û îqtîdarê Şamî de vatî.
Roniştişê dîyalogî yê bi nameyê “Pêkerdişê mabênê Rayberîya Xosere ya Herêma Vakûr û Rojhîlatê Sûrîyeyî û hukmatê Sûrîye de” ke şaristanê Hesekî de ameyo kerdene, Îlham Ehmed tayê nuqtayî dîyalogî şîrove kerdê. Roniştişî de rewşenbîr û kesê ke muhîmî danê rewşa sîyasî amade bîyê.
Îlham Ehmed îfade kerd ke peyman xeylê hetanê Vakûr û Rojhilatê Sûrîye û erdnîgarîya Sûrîye xo de hewînena û wina vat: “Nê semedî ra na peyman wayîrê xeylê beşan a û ci rê nîqaşî hîra lazim ê ke pêkerdişê hîrayî çarçewaya Sûrîyeyî bi pêroyî bêrê caardene.”
Îlham Ehmed dîyar kerd ke tayê notî performansê îqtîdarê Şamî ser o est ê, bi taybetî seba prosesî “Beyannameyê drestûrî”, awankerdişê hukmatî, ganî ê bêrê çareserkerdene. Îlham Îlham Ehmed: “Rayberîya Şamî berpirs a ke cewabê persanê komelê Sûrîyeyî bida û temsîlkaranê Sûrîyeyî madeyanê destûre ser o bida.”
‘Ma bi hewayêko cidî muhîmîye danê xurtkerdişê bendanê peymanî’
Îlham Ehmed da zanayene ke peymana rasterast, “Beyannameyê destûrî” yê demkî ame vetene û wina dewam kerd: “Notê ma seba beyannameyî est ê û seba nê nuqtayan têkîlîyê ma dewam kenê. Beyannameyê destûrî peymane ra ver amebi amadekerdene, dima ke peymane ameye parekerdene, beyannameyê destûrî zî tira ame vetene. Seba ke madeyê beyannameyê bêrê nîqaşkerdene, vetişê beyannameyî eşkayêne bêro betalkerdene. Seba ke komîteyê destûrî temsîlkarîya heme komelê Sûrîye nêkeno. Heme zanê ke komîteyê destûrî û madeyê aye hêvî û waştişanê şarê Sûrîyeyî temsîl nêkenê.”
Derheqê rolê Hêzanê Sûrîyeya Demokratîke (HSD) Îlham Ehmed wina vat: “Çîyê mabênê HSD û îqtîdarê Şamî de ameyê parekerdene, peymanêka pêroyî bîye. Demo ke komîteyî bêrê awankerdene, do temsîlkarê nê pêrabesteyan bîbê. Do komîteyê sîvîl û sîyasî bibê.”
Derheqê komîte û demê înan de zî Îlham Ehmed wina qisey kerd: “Seba awankerdişê komîteyan hema ma nê prosesî derbas nêkerdo. Mabênê Şam û Rayberîya Xosere de tena pêvînayîşêk bîyo û nuqtayanê pêroyî yê mijarên tarixê destpêkerdişê dayîş û girewtişan ameyê nîqaşkerdene.”
Îlham Ehmed wina dewam kerd: “Ma bi hewayêko cidî muhîmîye danê xurtkerdişê bendanê peymanî seba ke welatijî bi hewayêko pêroyî bawer bikerê û ma biresê Sûrîyeyêka newa.”
