Sûrîye de hêrişê vera elewîyan dewam kenê. Hums de Pirdê Mesyafî ser o servîsêk ame gulebarankerdene û 7 karkerê elewî ameyî kiştene. Goreyê SOHR’î, serra 2026î de heta nê hêrişî tewr kêmî 144 sîvîlî ameyî kiştene.
Badê ke Heyetê Tehrîrê Şamî (HTŞ) bi rayberîya Ehmed el Şara kanûna 2024î de Sûrîye de îqtîdar girewt, hêrişê vera elewîyan nêvindertî. Adara 2025î de şaristananê qeraxê deryayî de qirkerdişê elewîyan bî. Goreyê doneyanê Merkezê Taqîbkerdişê Heqanê Merdiman ê Sûrîye (SOHR), hêrişan serra 2026î de zî dewam kerd.
Hums de, nêzdîyê herêma El Houla, Pirdê Mesyafî ser o servîsêk ame gulebarankerdene ke muhendîs û karkerî kiriştêne. SOHR’î dîyar kerd ke goreyê agahîyanê verênan 7 karkerê elewî yê Şîrketê Metînî ameyî kiştene û 4 kesî birîndar bîyî. Ajansa xeberan a fermîye ya Sûrîye SANA zî dîyar kerd ke nêweşxaneyan rê zaf merde û birîndarî ameyî ardene.
Rojêk verê hêrişî, 29ê êlule de, SOHR’î raporêk weşana. Raporî de ame dîyarkerdene ke serra 2026î ra nata tewr kêmî 144 sîvîlî ameyî kiştene; înan ra 130 camêrd, 9 cinî û 5 doman ê. Raporî de ame vatene ke kiştoxî nêameyê vernîya edaletî û bêcezayî şîdetêko newe virazena.
Goreyê raporî, tewr zaf merdimî Hums de ameyî kiştene (70 kesî); dima Hama (31 kesî) û Lazqîye (14 kesî) yenê.
Adara 2025î de şaristananê qeraxê deryayî de tewr kêmî hezar û 500 elewî, temmuza 2025î de zî Suweyda de tewr kêmî hezar û 200 durzî ameyî kiştene. Komîsyonê Tehqîqatî yê Sûrîye yê Komîserîya Berze ya Heqanê Merdiman a NYyî 14ê tebaxe de dîyar kerd ke hêrişê artêşa newîye ya Sûrîye û grûbanê girêdayeyan “hîra, sîstematîk û beno ke sûcê şerî” yê. Rêxistina Efûyî ya Mîyanneteweyî û Human Rights Watch zî raporanê xo de bale antbî berpirsîyarîya hukmatî ser o.
