Fermandarîya Pêroyî ya Hêzanê Ewlekarîya Zereyî dîyar kerd ke Tebqa û Şedadî de hêrişê nuqteyanê hêzanê înan ameyo kerdene û encamê hêrişî de 5 endamê înan cuya xo vîndî kerda.
Fermandarîya Pêroyî ya Hêzanê Ewlekarîya Zereyî ya Herêma Vakur û Rojhelatê Sûrîye derheqê hêrişanê komanê çekdar ê vera nuqteyanê hêzanê ewlekarî yê şaristananê Tebqa û Şedadî de eşkerayîyêk weşanaye. Eşkerayî de nê çîyî ameyê vatene: “Grûbêka terorîst vizêr serê sibayî (14 temmuze) şaristanê Tebqa de hêrişê di nuqteyanê hêzanê ma kerd. Encam de 5 endamê ma birîndar bîyê. Şaristanê Şedadî de zî vera bendêkê ewleyî yê hêzanê ma hêrişêko nemerdane ame kerdene, encamê hêrişî de 5 endamê ma şehîd bîyê.
Kerdişê nê hewayî yê vera hêzanê ma hewldayîşêko seba binvistişê aramî û vilakerdişê kaosî yo. No kerdiş do ma wezîfeyê ma yo pawitişê komelê ma û ewlekarîya aye ra dûrî nêfîno. Ma do seba binvistişê heme projeyanê dişmentî yê bi amancê pêroyê Sûrîye de vetişê kaosî û Herêmanê Vakur û Rojhelatê Sûrîye de heme çî bikerê. Hêzê ma seba eşkerakerdişê nasnameyê grûba hêrişkar û terefgiranê aye cigêrayîşêko hîra dayo destpêkerdene.
Ma birîndaranê Hêzanê Ewlekarîya Zereyî yê Herêma Vakur û Rojhelatê Sûrîye rê şîfaya bi lez wazenê, xo rê û keyeyanê şehîdanê ma yê lehengan rê serweşîye wazenê. Ma soz danê şehîdanê xo ke ma do şopdarê rayîrê înan bibê, ma do deskewteyanê şorişî û prensîbanê şarê ma yo ke nê rayîrî de bedêl dayo, bipawê.”
