Rojnameyanê erebî qerarê PKK’î yê merasîmê îmhakerdişê çekan sey namekerdişê nîyetê holî yê sembolîkî ercnayî û va ke na gam hedef kena ke îtîmadî awan bikero û rayîrê Tirkîya a bikero ke sozê xo bîyaro ca. Rojnameyan şarê Fîlîstînî ra zî veng da ke ezmûnê şarê kurdî ra îstîfade bikero.
Rojnameyanê erebî nê sibayî rojeve xo de merasîmê tarîxî yê verpersdayîşê vengdayîşê Rayberê Şarê Kurdî Abdullah Ocalanî yê ke ewro şaristanê Sîleymanî de virazîyeno, sey hêvîyê Netanyahuyî yê caardişê pêameyîşê teslîmkerdişê hepsîyan ercnayî.
Çareserîya tarîxî ya bi kurdan reyde
Rojnameyê El Xelîc ardi vîr ke PKK do ewro Sîleymanî de bi beşdarîya rojnamegeran merasîmê îmhakerdişê çekan ê 30 endamanê xo virazo. Rojname qerarê PKK’î sey “gama sembolîke ya niyetê holî” name kerd ke “armancê ci awankerdişê îtîmadî, akerdişê rayîrî verê hukmatê Tirkîya yo ke gamê bînî bierzo û sozê xo yê aşîtîya domdarî bîyaro ca.”
Rojnameyî nîşan kerd ke Tirkîye do bikewo qonaxêka newîye û wina dewam kerd: “Bi qedîyayîşê demê çekanî reyde, meseleya kurd do biba dozeke sîyasî, sîvîl û demokratîkî. Çareserkerdişê aye do wext bigîro. No berpirsîyarîyeke ke hem hetê fermî yê Tirkîya û hem zî kurd gênê serê xo.”
Fîlîstînî do senî bikerê?
Rojnameyê El Erebî zî derheqê heman meseleyî de xeberêke weşanayî. Rojnameyî va ke qerarê PKK’î yê îmhakerdişê çekan nîno manaya destveradayîşê “dozê şarê kurdî”, la sey vurnayîşê rêbazî ercnayî.
Rojnameyî doza Fîlîstînî zî sey mîsal nîşan dayî û fîlîstînijan ra veng da ke ezmûnê neweyî yê kurdan ra ke têkoşînê çekdarî bedilna, têkoşînê aşîtîyane û sîyasî, îstîfade bikerê û dest nîşan kerd ke şer êdî xizmetê doza Fîlîstînî nêkeno, la ê de hevsengîyê hêzanê mîyanneteweyî de qels keno.
Netanyahu hêvî keno mîyan çend roje de agahî derheqê rehîneyan de bigo
Rojnameyê Şerq El Ewsatî zî cî dayî hewldayîşanê serokwezîrê Îsraîlî Benjamin Netanyahuyî yê bi armancê caardişê peymanêke bi Hamasî reyde seba veradayîşê rehîneyanê Îsraîlî ke do çarçiweya aşîtîya 60 rojan de bêro kerdene. Ame vatene ke Netanyahu vato ke hîna zî 50 hepsîyî Hamas reyde yê, tê bawerî keno ke tenya 20 înan ganî yê.
