Rayberê SOHR’î Ramî Ebdilrehmanî caardişê peymana mabênê HSD û hukmatê demkî de erjnaye û sey çarçewaya vindarnayîşê pirodayîşan û tay tedbîranê ewleyî yê sînordaran pênase kerd û dîyar kerd ke qeydeyê sereke, sey entegrekerdişê hêzan û agêrayîşê koçberan, rîyê çinbîyayîşê bawerîye û nakokîyanê sîyasî ra vindertê.
Rayberê Merkezê Çimdarî yê Heqanê Merdiman ê Sûrîye (SOHR) Ramî Ebdilrehmanî derheqê daraxê caardişê peymana 29ê çeleyî ajansê ANHA’yî rê qisey kerd û dîyar kerd ke ganî peymane goreyê eşkerayîyanê sîyasî nê, goreyê pratîkê erdê ser o bêra erjnayene.
Ramî Ebdilrehmanî vat peymane heta nika seba vindarnayîşê şerî tesîrdar bîya la amancê înan ê bingeyînî bi pêroyî nêameyê caardene. Ebdilrehmanî dîyar kerd ke caardişo qismî bîyo ke peymane heta aşma xo ya dîyine “çareserîyêka arame ra zafêr bîya resayîşêko hesas.”
Ebdilrehmanî diyar kerd ke qeydeyê tewr şênberî ke ameyê vindarnayene nê yê: Newe ra bicakerdişê hêzanê leşkerî, hewanayîşê dorpêçê Kobanî ser o, veradayîşê esîran û eşkerakerdişê çarenusê kesanê vîndîbîyayeyan û sewbîna garantîkerdişê agêrayîşê ewle yê koçberan û yewkerdişê rayberî û sazgehanê xizmetî.
Rayberê SOHR’î ereymendişê nê kerdişan sey çinbîyayîşê bawerîya mabênê hetan de, zafbîyayîşê hetanê eleqedar, nakokîyê îqtîdarî ser o û tesîrê hetanê herême reyde girêda.
Ebdilrehmanî astengîyê vernîya caaardişê peymane de wina rêze kerdê: “Nakokîyê sîyasî yê şeklê rayberî û ameyoxê herême ser o, problemê ewleyî yê rîyê hêrîşanê ke ge-ge qewimîyenê, sewbîna problemê îdarî yê derheqê rayraberdişê îqtîdarî.”
Derheqê agêrayîşê koçberan de Ebdilrehmanî dîyar kerd ke rîyê fikaranê ewleyî û çinbîyayîşê garantîyanê qanûnî û sewbîna daraxê xeripnayîşî, qelsîya xizmeta û bedilyayîşo demografîk ra ke serranê şerî de qewimîyayo, agêrayîşê înan sînordar mendo.
Ebdilrehmanî dîyar kerd ke şaristanê Kobanî seba cayê aye û muhîmîya aye ya sembolîke, ceribnayîşêko rasteqîn ê serkewtişê peymane yo û dîyar kerd ke aramîya qismî nêyena a mana ke problemê bingeyînî ameyê çareserkerdene.
Ramî Ebdilrehmanî hişyarî daye ke xeripîyayîşê peymane eşkeno bibo sebebê pêlêkê koçberî yo newe, xirabbîyayîşê ewleyîya nikayine û xorînbîyayîşê nakokîyanê Sûrîye.
