Neteweyanê Yewbîyayeyan (NY) eşkera kerd ke rîyê zêdebîyayîşê hêrişanê Rûsya ra, aşma temmuze ya 2026î seba sîvîlanê Ukrayna nîsana 2022î ra heta ewro bîya aşm a ke tede tewr zaf sîvîlî cuya xo ra bîyê.
Goreyê daneyanê Ofîsê Koordînasyonê Karanê Merdimîye yê Neteweyanê Yewbîyayeyan (OCHA), 6 aşmanê ewilî yê emserî de Ukrayna de 1,396 sîvîlî cuya xo ra bîyê û 7,978 kesî zî birîndar bîyî. NYyî eşkera kerd ke na hûmare seba eynî daneyanê serranê 2024 û 2025’î bi hawayêko eşkera zêde bîya.
Serekê Mîsyonê Çimdarîya Hêqanê Merdiman ê Ukrayna yê NY’yî Danîelle Bellî vat ke xebitnayîşê fuzeyanê balîstîk û çekanê menzîlderg yê serê herêmanê ke nufusê înan zêde yo, bîyo sebep ke xeylê hemwelatîyê sîvîlî cuya xo ra bibê û keyeyê sîvîlan de zerarêko pîl biqewimîyo.
Koordînatorê Hetkarîya Merdimî ya Ukrayna ya NY’yî Matthîas Schmale zî îfade kerd ke rixmê dewamkerdişê hêrişan keyeyî neweyî ke merdimê xo vîndî kenê, ca û waranê xo ra benê û mecbur manenê ke cuya xo newera awan bikerê.
Hêzê Hewayî yê Ukrayna eşkera kerd ke Rûsya pêroyê şewe 101 teyareyê bêmerdimî yê bêjê Şahed û di keştîeştoxî bêjê Oniks û fuzeyê antîradarî yê bêjê H-31P eştî.
Rayberîya Kîyevî da zanayene ke nînan ra 66 ÎHA hetê sîstemanê pawitişî yê hewayî ra ameyî eştiş yan zî bêtesîr ameyê verdayîş, 29 ÎHA û fuzeya Oniksî 18 xetê cîyayî hedef girewtî.
Wezaretê Pawitişî ya Rûsya zî vila kerd ke sîstemê înan ê pawitişî 605 teyareyê bêmerdimî yê aîdê Ukrayna îmha kerdî.
Moskova da zanayene ke ÎHA’yî serê herêmanê sey Belgorod, Kursk, Bryansk, Voronej, Kaluga, Lîpetsk, Rostov, Moskova, Qirim, Azak û Behra Sîya de ameyî vistiş.
Sewbîna rayedaranê Rûsî dîyar kerd ke ÎHA’yê aîdê Ukrayna herêma Tverî de merkezêko lojîstîkî yo aîdê şîrketê bazirganîya onlîne ya bi nameyê Wîldberrîesî hedef girewt û tesîso ke behsê ci beno, uca de zerarê şenikî qewimîyayê.
