Rûsya seba herêma Kalînîngradî NATO hişyar kerd û va ke eke cehd bikerê na herême îzole bikerê, ê do çekanê nukleeran bişuxulnê.
Moskova belgeyêk NATO rê erşawit û va ke eke NATO cehd bikero ke Kalînîngradî Rûsya ra îzole bikero, ê do heme hêzê xo, heta çekê nukleerî, seba pawitişê na herême bişuxulnê. Sewbîna Moskova NATO gumanbar kerd ke pey rayîrêk ra yena ke eşkena bibo sebebê şerêko tehlukeyin.
Sekreterê Pêroyî yê NATOyî Mark Ruttî va ke NATOyî cewab da Moskova û eşkera kerd ke çalakî û perwerdeyê NATO erdanê Rûsya ser o tehluke nêvirazenê. Ruttî sewbîna vengdayîşê Rûsya kerd ke peynîya şerî Ukrayna biyaro û bi çekê nukleerî NATO tehdît nêkero.
Ruttî sewbîna va ke eke Rûsya tevgerêka qij zî vera Fînlandîya, welatanê Baltîkî ya zî Polonya bikero, do cewab bêro dayîş. Ê dîyar kerd ke DYA hema zî pawitişê Ewropa kena û piştî dana Ukrayna.
Wezaretê Pawitişî yê Rûsya zî eşkera kerd ke hêzê înan lîmanê Chornomorskî, Deryaya Sûrî ser o, keştîyêka barkerde bombardûman kerd. Kîev de zî merkezêk neqlkerdiş û lojîstîkî û Odessa de merkezêko agahîyanê îstîxbaratê eskerê Ukrayna ame bombardûmankerdiş.
Rayedaranê herême yê Ukrayna eşkera kerd ke netîceyê bombardûmananê Rûsya de Kîevî de kesêk û Odessa de zî kesêk birîndar bîyî. Sewbîna binawanîya şaristanan zerar dîyo.
