Kabîne ewro bi serekîya Serokkomar Erdoganî kom beno. Kombîyayîşî de xebatê binkomîsyonanê ke çarçewaya prosesî de ameyî awankerdene, averşîyayîşê ekonomî, pêkewtişê DYA-Îranî, rewşa Tengawa Hurmuzî û şerê Rûsya-Ûkrayna yenê erjnayene.
Kabîneyê Serokkomarîye ewro bi serekîya Serekê Pêroyî yê AKPyî û Serokkomar Recep Tayyîp Erdoganî kom beno. Kombîyayîşî de zaf babetê krîtîkî yenê rojeve.
Babetanê tewr krîtîkan ê rojeve ra yew proses o. Konseya Taqîbkerdiş û Nirxnayîşî ya ke Hetkarê Serokkomarî Cevdet Yilmaz serekîya ci keno, kombîyayîşê xo yo verên 24ê tebaxe de viraştbî û qerar dabî ke 4 binkomîsyonî bêrê awankerdene: Binkomîsyonê Koordînasyonê Karanê Edlî û Huqûqîyan, Binkomîsyonê Çimdarî û Tesbîtî, Binkomîsyonê Aheng û Yewbîyayîşê Sosyalî û Binkomîsyonê Bêçekbîyayîş û Koordînasyonê Stratejîkî. Yeno pawitene ke xebatê merheleya awanbîyayîşê nê binkomîsyonan bêrê nirxnayene.
Polîtîkaya teberî de bê averşîyayîşanê herêmkîyan, şerê Rûsya û Ûkrayna zî yeno nirxnayene; yeno pawitene ke detayê têhetameyîşê Erdoganî yê hewteyê vîyarteyî bi Serokdewletê Rûsya Vladîmîr Putînî reyde yê Zîrweya Serokdewletanê Rêxistina Hemkarîya Şanghayî zî qisey bibo. Pêkewtişê mabênê DYA û Îranî ke bîyî sebebê zêdebîyayîşê fîyatanê petrolî, rewşa peyêne ya Tengawa Hurmuzî û tesîrê ci yê herêmkî û ekonomîkî zî rojeva kabîneyî de yê.
Averşîyayîşê ekonomî û Programê Demê Mîyanênî (OVP) zî kabîneyî de yenê nirxnayene. Yeno pawitene ke prosesê teslîmkerdişê projeyê 500 hezar keyeyanê sosyalan ê kîra yê Îstanbulî ke hetê Wezaretê Cugeh, Bajarvanî û Vurîyayîşê Îklîmî ra ameyo amadekerdene, o zî bêro nirxnayene.
