Neteweyê Yewbîyayeyî (NY) dîyar kerd ke emser Sûdan de 2 hezar û 230 merdişanê sîvîlan ê ke tesdîq kerdê, înan ra 1 hezar û 630î ra zêde hêrişanê ÎHAyan ra bîyê. NYyî bale ante ser o ke xebitnayîşê ÎHAyan bîyo taybetîyêka dîyarkerdoxe ya şerî.
Komîserîya Berze ya Heqanê Merdiman a NYyî roja sêşemeyî eşkerayîyêk da û da zanayene ke şerê Sûdanî yê zereyî de serra ra nat merdişanê sîvîlan ê tesdîqbîyayeyan ra nêzdîyê çar parçeyan ra hîrê parçeyî hêrişanê teyareyanê bêmerdiman (ÎHA) ra bîyê. Goreyê NYyî hûmara raştikêne ya merdişan beno ke hîna berz a.
Komîserê Berz ê Heqanê Merdiman ê NYyî Volker Türkî hetê pêrodayîşî bi “peygoşkerdişê huqûqê şerî” sucar kerdî û hişyarî da ke beno ke nê binpaykerdişî sûcê şerî bê.
Mabênê artêşa Sûdan û Hêzanê Piştîdayîşê Lezî (HDK) de şer nîsana 2023î ra nat dewam keno. Aşmanê peyênan de her di hetan zî hêrişê ÎHAyan zêde kerdî.
Raporê NY’yî de ke aşmanê çele-hezîrane gêno xo mîyan, ame dîyarkerdene ke zêdebîyayîşê xebitnayîşê ÎHAyan bîyo taybetîyêka dîyarkerdoxe ya pêrodayîşî. Goreyê raporî nê aletî îmkan danê hetan ke waran û xetanê cepheyî yê ke kontrol kenê, ê cayan ra zaf dûrî hêriş bikerê.
Eşkerayîya NY’yî de ame notkerdene ke ÎHAyî tena pêrodayîşanê rasterastan de ney, hêrişanê vera binawanîyanê sey çimeyanê awe û temînkerdişê elektrîkî de zî ke seba cuye gan ê, hîna zêde yenê xebitnayene.











