Keyeyê hepsîyanê nêweşan ê ke şaristananê Vakurê Kurdîstanî ra ameyî, DEM Partî, OHD, ÎHD û sazgehanê demokratîkan seba verdayîşê hepsîyanê nêweşan verê Wezareta Edaletî de dest bi nobeta bêmudet kerd.
Keyeyê hepsîyanê nêweşan ê ke Vakurê Kurdîstanî û Tirkîya ra ameyî Ankara, TUAY-DER, DEM Partî, OHD, ÎHD û zaf kesan bi waştişê verdayîşê hepsîyanê nêweşan û heqê weşîye verê Wezareta Edaletî de dest bi nobeta bêmudet kerd. Parlamenterê DEM Partî û zaf kesî zî seba piştîdayîşî beşdarê eşkerayî bîyî. Eşkerayî de pankarta ke nameyê hepsîyanê nêweşan û “Ma do berê zîndanan bi xoverdayîşî akerê” ser o nuştebî, ameye akerdene. Beşdaran bê vindertiş sloganê “Hepsîyê sîyasî rûmeta ma yê” û “Hepsîyanê nêweşan rê azadî” vatî.

‘Heta ke hepsîyê nêweşî nêrê verdayene çalakîya ma do dewam bikera’
Hemverfeka TUAY-DER’î ya Ankara Şîrîn Altaye vat: “Prosesê Aştîye û Komelê Demokratîkî reyde zî hepsîyê nêweşî hema zî hepisxaneyan de ganê xo ra benê û verdayîşê înan yeno astengkerdene. Ma seba ke vengê xo biresnê berpirsîyaran tîya de dest bi çalakîye kenê. Ganî hepsîyê nêweşî cade bêrê verdayene.”
‘Êdî pey sebrê ma nêmendo’
Parlamenterê DEM Partî yê Mêrsînî Alî Bozanî dîyar kerd ke nêverdayîşê hepsîyanê nêweşan bawerîya prosesî şikneno û vat: “Ma seba ke kes nê ra pey nêmiro têkoşîn kenê. La hema zî hepsîyî ganê xo ra benê. Hewteyo verên hepsîyo nêweş Tuncer Saglam ganê xo ra bî. Ma tîya ra venga Wezareta Edaletî û sazgehanê dewlete danê ke goreyê prosesî hereket bikerê û hepsîyanê nêweşan verdê.”

‘Dayîkê kurdan hema zî bermenê’
Sultan Bozkurte ke dayîka hepsîya nêweşe Newroz Bozkurte ya, dîyar kerd ke kêna aye losemîya kronîke ra nêweş a û halê aye xeternak o û wina vat: “Hema zî mi nêşîya kêna xo bivîna. Uca nêweşxane nîyo, hepisxane yo. Bi nê prosesî ma vat nê ra pey dayîkî nêbermenê. La dayîkê kurdan hema zî bermenê. Ez reyna venga sazgehanê dewlete dana ke hepsîyanê nêweşan cade verdê.”

‘Heqê weşîye heqêko bingeyin o’
Mêrdê hepsîya nêweşe Evîn Zapsu ke teşxîsê kanserê merheleya 4. aye rê ameyo kerdene, Mecîd Zapsuyî vat: “Heqê weşîye heqêko bingeyin o. La seba ke no heq yeno binpaykerdene ewro hepsîyî bi zaf nêweşîyan reyde rî bi rî manenê. Cinîya mi Evîn zî hepisxane de nêweş kewte û seba ke tedawîyêka rinde nêameye kerdene halê aye giran bî. Heta ke hepsîyê nêweşî nêrê verdayene ma do çalakîya xo dewam bikerê.”
Qiseykerdişan ra pey beşdaran dest bi nobete kerd. Badê demêk polîsan waşt ke mudaxeleyê çalakîye bikerê. Vera naye beşdaran cewab da û binê dorpêçê polîsan de çalakîya xo dewam kenê. Ame vatene ke nobete do meşte zî eynî ca de dewam bikera.











