Pîrozkerdişê Newroza Wanî bi hawayêko bi coş dest pêkerd. Meydanî ra dirişmeyê “Bijî Serok Apo” berz bîyî û mesajê piştîdayîşî yê vengdayîşê Abdullah Ocalanî ameyî dayene.
Partîya Herêmanê Demokratîkan (DBP), Tevgerê Cinîyanê Azadan (TJA) û Partîya Seypêyî û Demokrasîya Şaran (DEM Partî) pêşengîya înan de Wan de bi dirişmeyanê “Rayberîya Azade Komelo Demokratîk” û “Komelo Demokratîk seba Azadîye” pîrozkerdişê Newroze yeno viraştene. Des hezarî kes merkez, qezayê pêroyî û taxanê dewan ra, serê sibayî ra herikîyayî Meydanê Newroze ke kîşta Kela Wanî de yo.
Coşo ke her deqa zêde beno, meydanî ra rey-rey dirişmeyê “Bijî Serok Apo” berz bîyî. Ciwan û cinîyan, bi cil û berganê renginan meydan xemilna. Hem zî beyreqanê renganê kesk, sûr û zerdî ameyî berzkerdiş.
‘Ganî azadîya Ocalanî ya fîzîkî bêro temînkerdiş’
Program, bi vindertişê hurmete ke seba kesê ke têkoşînê azadî û demokrasî de cuya xo vind kerda, dest pêkerd. Komîteyê Organîzasyonê Newroze silam da beşdaran. Hemserekê Şaristanî yê DEM Partî Veysî Dilekçîyî va: “Ma têkoşînêko gird da ke ma biresê nê rojan. Tîya ra ma îlan kenê ke ma do piştîdayîşêko pîl bidê vengdayîşê aştî yê Rêberê Şarê Kurdî Rêzdar Ocalanî. Heta ke aştî bêro, ma do têkoşînê xo dewam bikê.”
Hemsereka Şaristanî ya DBP’yî Gonul Uzunay va: “Şarê Wanî seranser tarîxî de têkoşînê xo rê wayîrîye kerd. Şarê Wanî do vengdayîşê Rêzdar Ocalanî rê zî wayîrîye bikero. Şarê ma çîyê ke kewenê milê xo ser, do bîyaro ca. Çîyo ke nika ganî bêro kerdene, tewr muhîm azadîya Rêzdar Ocalanî ya fîzîkî ya. Ganî no bêro temînkerdiş.”
