MED-DER’î belgeyê domanan ke mezûn bîyî daye û bale ante muhîmîya ziwanê dayîke ser.
Komeleya Cigêrayîşê Ziwan û Kulturî yê Mezopotamya (MED-DER) bi wesîleya peynîya dewrî belgeyê serkewtişî dayî domanê ke kursanê kurdkî ra mezûn bîyî. Domanî pîya bi keyeyanê xo tewrê aktîvîte bîyî.
Hemserekê MED-DER’î Mehmet Remzî Azîzogluyî ke tîya de verî qisey kerd, bale ante muhîmîya wayîrvejîyayîşê ziwanê dayîke ser û vat: ”Her netew bi ziwanê xo est o ma zî bi ziwanê xo est ê. Domanê ma roje bi roje ziwan û kulturê xo ra kewenê dûrî. Nê semedî ra ma wayîrê ziwan, nasname û kulturê xo bivejê.”
Dima ra şaîr û nuştox Musa Şanakî bale ante muhîmîya ziwanê dayîke ser û şîîra xo ya “Wa Pîrozbin Tevlî Me” wende. Program badê goştarîkerdişê dengbejan bi girewtişê govende qedîya.
