Komîteya Wezîran a Konseya Ewropa, qerarê xo yê peyên ê derheqê dosyaya Selahattîn Demîrtaş û Fîgen Yuksekdag de vengdayîşê xo yê seba bilez veradayîşê her di sîyasetmedaran reyna tekrar kerd. Sewbîna, komîte waşt ke Osman Kavala zî bêro veradayene.
Komîteya Wezîran a Konseya Ewropa mîyanê rojanê 9-11ê hezîrane de şaristanê Strasbourgî ê Fransayî de, ronîştîşê xo yê 1563. ê Heqanê Merdiman viraşt. Nê ronîştîşî de, qerarê Mehkemaya Heqanê Merdiman a Ewropa (MHME) yê ke hetê Tirkîya ra nêaameyê ca, reyna ameyî erjnayene.
Komîte ard vîr ke qerarê derheqê Selahattîn Demîrtaş û embazanê ci de hetê MHME’yî ra ameyo kifşkerdene ke derheqê sucdarkerdişê parlamenteranê ê wextî de îspat û delîlê besî çin ê.
Qerarî de ame dîyarkerdene ke ê bi amancê sîyasî ameyê girewtişû hewanayîşê heqê înan ê destnêdayîşê parlamenteran û rîyê qiseykerdişanê sîyasîyan ra sucdarkerdîşê înan, krîteranê huqûqî pêşwazî nêkeno.
Motîvasyono sîyasî dewam keno
Komîteya Wezîran bal ant qerarê MHME’yî yê “Selahattîn Demîrtaş (No. 4)” ser o û dîyar kerd ke delîlê mehkemayanê hûqûqê zereyî seba rewakerdişê girewtebîyayîşê Selahattîn Demîrtaş û Fîgen Yuksekdag bes nîyê.
Komîte eşkera kerd ke no qerar, erjnayîşanê verênan piştrast keno û motîvasyonê sîyasî yê binyadê na dewa, estbîyayîşê xo domneno.
Ganî her di sîyasetmedarî bilez bêrê veradayene
Qerarî de vengdayîşê seba bilez veradayîşê Selahattîn Demîrtaş û Fîgen Yuksekdag reyna ame tekrarkerdene.
Ame vîrardene ke dewletê endamî wayîrê berpirsîyarîyê yê ke bêşert û merc qerarê MHME’yî bîyarê ca. Qerarî de sewbîna “endîşeyê xorînî” ameye parekerdene ke Mehkemaya Destûrê Bingeyinî (AYM) û Mehkemaya Edlîyeyî ya Herêmî warê qerardayîşê muracatan ser o gamê lazimî nêeştî.
Komîte dîyar kerd ke ganî her di mehkema zî gerreyanê kesanê ke muracat kerdo, bêyî ke erey bikewo û goreyê qeraranê MHME’yî bierjnê.
Dosya do aşma êlule de reyna bêra erjnayene
Komîteya Wezîran qerar da ke erjnayîşê dosyaya Selahattîn Demîrtaş û Fîgen Yuksekdag, kombîyayîşê 1569. ê Heqanê Merdiman de dewam bikero ke do aşma êlula 2026î de bêro kerdene.
Komîte, eynê wextî de rayedaranê Tirkîya ra waşt ke gamanê ke ameyê eştiş yan zî ê ke yenê plansazîkerdene ser o, çarçewaya xebatanê çareserkerdişê meseleya kurdî de agahî bidê.
‘Heqê Hêvî’ nêame rojev
Komîte verê cû roniştişê êlula 2025î de dosyaya ke Rayberê Şarê Kurdî Abdullah Ocalan zî tede bi û bi nameyê “Grûba Gurban” ameyêne naskerdene, erjnabi. O wext Tirkîya ra ameyêne waştene ke vurnayîşanê qanûnîyan serr o agahî bida.
Labelê kombîyayîşê hezîrana 2026î de babeta “heqê hêvî” neameye rojev û na babete ser o erjnayîşêo newe nêame kerdene.
Seba Osman Kavala qerarê veradayîşî
Qerarê derheqê Osman Kavala de ke serra 2017î ra heta nika zindan de yo, qerarê verênî ameyî vîrardene. Ame dîyarkerdiş ke endaman “xemgînîya xo ya xûre” derheqê girewtişê dewamî yê Osman Kavala û nêbîyayîşê qerarê MHME’yî de îfade kerd û waştişê veradayîşê Osman Kavalayî kerd.
