Edîrne – Tulay Hatîmogullari, Selahattîn Demîrtaş hepisxane de zîyaret kerdişî ra pey eşkerayîye de vat ke 4ê teşrîna peyêne ya 2016î ra pey rejîmê qeyûmî pêro welat dorpêçkerd û vat: “Heta ke pêro girewteyê sîyasî azad bibê, têkoşîn dewam keno.”
Hemsereka Partîya Têduştî û Demokrasîya Şaran (DEM Partî) Tulay Hatîmogullari û heyeto ke ci reyde bî, seba serrgêra “darbeya sîyasî” ya ke 4ê teşrîna peyêne ya 2016î de Partîya Demokratîk a Şaran (HDP) rê ame kerdene, Hemserekê verênê HDPyî Selahattîn Demîrtaş, ke Hepisxaneya Edirneyî de yo, zîyaret kerd. Heyetî zîyaret ra pey hepisxane ver de eşkerayî daye. Serekê Pêroyî yê Partîya Emekî (EMEP) Seyit Aslan, temsîlkarê partîyanê çepî-sosyalîstan û zaf hemwelatîyî eşkerayîye de beşdar bîyî. Eşkerayîye de sloganê “Bê Rayber ciwîyayîş çin o”, “Xoverdayîşê hepisxaneyan bijîyo” û “Bi Xoverdayene ma do serkewê” ameyî eştene.
Hemserekê DEM Partî Tulay Hatîmogullari, tepîştê dewaya Kobanêyî ser o bale ante ke ganî bêrê veradayene û vat: “Bi taybetî seba Fîgen Yuksekdag û Selahattîn Demîrtaşî biryarê Mahkemeyê Heqanê Merdimî yê Ewropayî (MHME) estê. No biryar seba ke hevalê ma ameyî hes kerdene nîyo; mojneno ke hevalê ma heqdar ê. Yanî biryarêko hiqûqî yo. Tirkîyayî rê wezîfeyêko hiqûqî yo ke nê biryaran tatbîq bikero. Nika, sey ke peymanê ke ey îmza kerdê çin bê, hevalê ma hema hepisxane de tepîşîyenê. Her roja ke hevalê ma hepisxane de manenê, nêqanûnî ya. Ganî nika bêrê veradayene.”
‘Têkoşîn dewam keno’
Tulay Hatîmogullari vat: “Pey ke hevalê ma ameyî tepîştene, ‘rejîmê qeyûmî’ welat de sey rejîmêko bi temamî newe ame caardene. Qeyûm Wan de û zaf wîlayetanê Tirkîya de qewimî. Unîversîteyan de, cayê kar de rejîmê qeyûmî xo mojna. Qeyûm tena wîlayetanê kurdan de nêmend, pêro muxalefet de vila bî. Tena tradîsyonê HDPyî de nê, labelê metodê ke tiya de dest pê kerd, pêro muxalefetî ser o ame tatbîqkerdene. Nika Şaredarê weçînayeyî yê Stenbolî Ekrem Îmamoglu û zaf şaredarê weçînayeyî tepîştî ê. No mojneno ke rejîmê ke 4ê teşrîna peyêne de dest pê kerd, pêroyê Tirkîya de vila bîyo. Ma rejîmê qeyûmî qebul nêkenê. Selahattîn Demîrtaş, Fîgen Yuksekdag û pêroyê girewteyê Kobanêyî ganî nika bêrê veradayene. Fîgen Yuksekdage roportajo ke dabî de vana: ‘Ê fikirîyayî ke ma do teslîm bikerê, labelê nêeşkayê. Xeyalê ma nêkiştî.’ Ma eşkera kerd ke ma do Serek Selahattîn zîyaret bikerê û ma rê hezaran mesajê ‘Silamê ma biresnê’ ame. Serek Selahattînê hezkerde payra yo û vat: ‘Pêroyê şaranê Tirkîya rê hes û silamê mi biresnê.’ Ey, Prosesê Aştîye û Komelê Demokratîkî rê ‘şertanê girewteyîye de zî piştîdayîş dewam kenê û na erdan de bedel dayê, labelê her çi bibo cehdkerdişê aştîye nêbirnê’ vat. Heta ke pêro girewteyê sîyasî azad bibê, têkoşîn dewam keno. Hevalê ma yê zereyî têkoşînê xo dewam kenê, ma zî teber de seba awankerdişêko demokratîk têkoşînê xo dewam kenê. Heta ke yew girewteyêko sîyasî nêmano, têkoşînê ma dewam keno.”
‘Vengdayîşê eştişê gamî’
Serekê Pêroyî yê EMEPî Seyit Aslan, dîyar kerd ke seba ke aştî bêro awankerdene, ganî girewteyê sîyasî bêrê veradayene, pratîkê qeyûmî bêrê qedênayene û gamê ke ciwîyayîşê pîya yê şarê kurdî bi şertanê seypê mumkîn bikerê bêrê eştene, û vat: “Ma wazenê ke girewteyê sîyasîyê bînî, serê ci de Selahattîn Demîrtaş û Fîgen Yuksekdag, bê ‘ama’, bê ‘labelê’ bêrê veradayene. Ma wazenê ke pêroyê şaredarê ke herêm û rojawanê Tirkîya de qeyûm ci rê ame tayînkerdene, peyser wezîfeyê xo ser o bêrê û pratîkê qeyûmî bêrê qedênayene. Ma wazenê ke seba ciwîyayîşê pîya yê şarê kurdî gamî bêrê eştene, serê ci de heqê perwerdeya ziwanê dayîke, tanzîmatê lazimî bêrê kerdene. Eke nê çîyî nêrê kerdene, eke nê gamî nêrê eştene, ma nêeşkenê biresê aştîye, nêeşkenê aştî awan bikerê.”
‘Waştişê aştîye yê kurdan rê wayîr vejê’
Parlamenterê DEM Partî yê Stenbolî û Verfekê Platformê Piştîpêdayîşê Sosyalîstî (SODAP) Kezban Konukçu zî dîyar kerd ke seba ke Prosesê Aştîye û Komelê Demokratîkî aver şêro, ganî zemînê têkoşînê hempar bêrê girdî kerdene. Konukçu vat: “Seba ke proses reyna aver şêro, ganî ma zemînê têkoşîna xo yê hempar girdî bikerê, hemsengîya mabênê têkoşîn û muzakereyî awan bikerê û zaf vêşêr pêser bêrê. Çike na welat de, seba ke nanê şarî girdî bibo, azadîya cinîyan, heqê ciwîyayîşê ma û aştîya şarê kurdî bi dest bikewo, ganî têkoşîn girdî bikerê. Nê waştişî bi girêyanê nêbirnayeyî yewbînî ra girêdayî ê.”
Kezban Konukçu, raya pêroyî ya çepê sosyalîstê Tirkîya rê venga xo daye û vat: “Ez wazena ke çepê sosyalîstê Tirkîya rê vengdayîş bikera; bê ‘ama’, bê ‘labelê’ waştişê aştîye yê şarê kurdî rê wayîr vejê.”
