Endamê Konseya Îcrayî ya KCKyî Mustafa Karasuyî bernameyêko taybet ê Medya Haber TVyî de qisey kerd û derheqê rojdemanê muhîman ê Kurdistan, Tirkîya û Rojhelatê Mîyanênî de nirxnayîşî kerdî.
Karasuyî derheqê Prosesê Haştî û Komelê Demokratîkî de destnîşan kerd ke 24ê gulane ra nat Rayber Apoyî reyde pêdîyayîş nêameyo kerdene û no problemêko cidî yo. Vat ke nêzdîbîyayîşê dewlete yê vera serekî yê meseleya kurdan qebûl nêbeno û eke mesele reyna sey veşnayîşê çekan bêro girewtene ne şar, ne rêxistine û ne şerkerî do rewşêka wina qebûl bikerê. Destnîşan kerd ke meseleya kurdan bi piştîdayîşê komelkî, bi pêkerdişê partîyanê sîyasî û bi teyîdkerdişê qanûnanê ke do bêrê vetene, hetê Rayber Apo û Têgêrayîşê Azadî ra çareser bena.
Karasuyî destnîşan kerd ke wexto ke prosesî de şer zaf yeno munaqeşekerdene, pêdîyayîşê Serekê MÎTî Îbrahim Kalinî yê Bexdat, Hewlêr û Silêmanîye pers ard vîrî ke “gelo hazirîya şerî bena?” û vat ke dewleta tirke wazena teqrîben herême de herkesî Hereketê Azadî ya Kurdan ser bişawo. Derheqê kombîyayîşê NATOyî yê Tirkîya de zî vat: “Tirkîya bi rotişê xo, heta bi zeliqîyayîşê ABDyî û Îsraîlî, hesabê ‘gelo ez eşkena polîtîkaya jenosîdî ya kurdan ser o dewam bikera’ de ya. Tirkîya hema wazena bi piştîdayîşê teberî problemê xo yê zereyî çareser bikera. No seba Tirkîya polîtîkayêka bêbinge ya.”
Karasuyî derheqê kombîyayîşê NATOyî de destnîşan kerd ke NATO rêxistinêko leşkerî yo, yê haştî ney, û wazeno ke Tirkîya bikero hîna girêdayeyê ABD û Îsraîlî. Vat ke Tirkîya wazena bi piştîdayîşê teberî problemanê xo yê zereyî çareser bikero, la nê polîtîkayêka bêbinge ya çunke domdarîya girêdayîşê teberî nêyena zanayene.
Karasuyî destnîşan kerd ke eke Tirkîya bi piştîdayîşê hêzanê teberî reyna biwazo serdestîya xo kurdan ser o dewam bikero, do bin bikewo çunke kurdî êdî kurdê verênî nîyê: “Sûrîye de ma dî. Vera DAÎŞî têkoşîno tewr zêde kurdan da, 10 hezaran ra vêşêr şehîdî dayî. La kurdî êdî sey verê bêhêz nîyê, kurdan sey verê fedakerdiş hende asan nîyo.”
Karasuyî derheqê hêrişanê Îranî yê vera Rojhelatê Kurdistanî de vat ke Îran zaf hetan ra zeîf bîyo û ganî problemanê xo bi komelê xo, bi kurdan, azerîyan, ereban, belûçan û cinîyan, bi pêkerdişî çareser bikero, bi ferzkerdişî ney. Nê demî de şehîdê ke Rojhelatê Kurdistanî de dayî, ard vîrî û destnîşan kerd ke ganî Îran hêrişanê vera şaran ra fek verado.
Peynî de Karasuyî derheqê Xoverdayîşê 14ê temmuze de vat ke xoverdayîşê rejîmê 12ê êlule bi binkewtişê îdeolojîkî reyde rîbirî kerd û şarê kurdan felsefeya cuye û xoverdayîşî ard meydan. Vat ke şar bi nê xoverdayîşî biîrade bî û destnîşan kerd ke ganî xorîn bêro fehmkerdene ke nê xoverdayîşî derheqê tarîxê Kurdistanî de çiqas manadar ê.
