KCK’yî vat: “Wezîfeyê ma yê serra 29. ya komployî de têkoşînî her warî de berz bikerê û Rayber Apo û şarê kurdî azad bikerê. Serra 29. venga heme şarê kurdî, embazanê ey û hêzanê demokrasî dana ke têkoşînî berz bikerê.”
KCK’yî dîyar kerd ke komplogeran waşt Rayber Apo tesfîye bikerê. Goreyê KCKyî, Rayber Apoyî polîtîkaya çareserîya demokratîke ya persa kurdan bi wayûbirayîya şaran ramitêne û nê hêzê ke wazenê bi parçekerdişê Kurdîstanî hegemonya xo Rojhilatê Mîyanênî de bidomnê, tersnayî. KCKyî vat: “Înan waşt tesîrê Rayber Apoyî bişiknê, la bi xoverdayîşê ‘Şima Nêşenê Roja Ma Tarî Bikerê’ reyde rî bi rî mendî. Rayber Apoyî Îmrali de têkoşînê vera komployî resna bingeyêkê îdeolojîk-polîtîkî. Têkoşînê ke çar parçeyanê Kurdîstanî de aver şî, kurdî kerdî hêzêko ke nêameyêno înkarkerdene.”
KCK’yî ard vîrî ke Rayber Apoyî pawitişê xo yê DEMHî de vato: “Komployê tarîxî averşîyayîşan nêvindarnenê, lez danê ci.” Goreyê KCKyî, Rayber Apoyî bi pawitişanê xo û Manîfestoyê Komelê Demokratîkî derbêk da sîstemê modernîteya kapîtalîste ro û rayîrê xelasîya însanîyetî nîşan da. KCK’yî vat ke komployê mîyanneteweyî şexsê kurdan de vera heme şaranê Rojhilatê Mîyanênî ame kerdene.
KCK’yî bale ante ke tacîdarkerdişê Prosesê Haştî û Komelê Demokratîkî bi azadîya Rayber Apoyî û şarê kurdî, komployê mîyanneteweyî bi temamî pûç keno. KCKyî wina vat: “Serra 29. venga heme şarê kurdî, embazanê ey û hêzanê demokrasî dana ke têkoşînî berz bikerê. Şarê ma ke serrgêra komployî de her ca ra têkoşîn berz kerd, bi domnayîşê têkoşînê xo yê bêvindertişî do komplogeran bişawo goristanê xirabîyanê tarîxî.”
