Komîsyonê Têkilîronayîşê Îxlalanê Heqanê Çapemenîye yê Şaxê ÎHD’yî yê Anqara, raporêko derheqê îxlalanê vera rojnamegeran ê 6 aşmanê peyênan de weşana. Endamê Komîsyonî Ercan Îpekçîyî da zanayene ke mekanîzmayê şîdetî yê vera çapemenîye bîyê domdarî.
Komîsyonê Têkilîronayîşê Îxlalanê Heqanê Çapemenîye yê Şaxê Anqara yê Komeleya Heqanê Merdiman (ÎHD), raporê xo yê derheqê îxlalanê heqanê çapemenîye yê vera rojnamegeran de ke 6 aşmanê peyênan de ameyî kerdene, çarçeweya 24ê Temuze Roja Têkoşînê Azadîya Çapemenîye de merkezê komele de eşkera kerd.
Endamê Komîsyonî Ercan Îpekçîyî bi yadkerdişê rojnamegeran Nazim Daştan û Cîhan Bîlgîn ê ke 19ê Kanûne 2024î de ameyî kiştene û rojnameger Azîz Koyluoglûyo ke 27ê Çeleyî de ame kiştene, dest bi qiseykerdişê xo kerd.
Îpekçîyî îzeh kerd ke azadîya çapemenîye giredayeyê heqanê merdiman a û wina va: “Azadîya çapemenîye û îfadeyî eynî wext de yena manayê heqê komelî yê xeberan û malûmatîgirewtişî.”
‘Komîsyon çareserîyî hedef keno’
Îpekçîyî da zanayene ke hedefê komîsyonî o yo ke îxlalanê heqanê rojnamegeran qeyd bikero û dîyar kerd ke namekerdişê rojnamegeran sey “endamê rêxistinêka nêqanûnî” ya zî “terorîst” tehqîqatan de ke semedê karanê înan ê meslekî ra vera înan ameyê destpêkerdene, mojneno ke yew problemêko cîdî est o.
Îpekçîyî wina va: “Dariznayîş û tepiştişê rojnamegeran binê nameyê ‘terorîzm’î de Tirkîya bîyo namdar. Tepiştiş ke darazê cezayî de yew metod o ke sey tedbîrê pawitişî yo tewr girde tay rewşan de, sey îhtîmalê remayîşî ya zî çinkerdişê delîlan, eşkeno bêro şuxulnayene, la Tirkîya de, bi taybetî vera rojnamegeran, bîyo yew metodê cezakerdişî. Heqî û azadîyê bingeyênî Tirkîya de serra 2015î ra nata bi hawayêko dewamdar kêmî benê. Pê Halê Îstîsnayî, nê mekanîzmayê şîdetî bîyê domdarî. Wexto ke ma azadîya çapemenîye ser o munaqeşe kenê, mûmkîn nîyo ke merdim behsê demokrasî ya zî serwerîya huqûqî nêkero. Mewzuyê xeberan ê ke bi hawayêko kategorîk ameyî astengkerdene, rojnamegerê ke hetê daraze ra ameyî bêteskerdene û polîtîkayê bêcezayîye yê vilayî naye bi hawayêko eşkera mojnenê.”
