Hemserekê OHD’yî yê Amedî Avûkat Muhîttîn Muguçî ke vengdayîşê Îmraliyî û averşîyayîşê ke dima ra bîyî erjnayî û vat ke heqê hêvî têna meseleyêka huqûqî nîya, eynî wextî de parçeyêkê têrîameyîşê bi demokrasîyî yê Tirkîya yo.
Hemserekê Şûbeyê Amedî yê Komeleya Huqûqnasan a Seba Azadîye (OHD) Avûkat Muhîttîn Muguçî vengdayîşê Îmraliyî û averşîyayîşê derheqê babete ajansê ANF’î rê erjnayî.
Muhîttîn Muguçî ard ziwan ke mesele têna sîyasî nîya eynî wextî de hetê ci yo huqûqî zî est o.
Muguçî bale ante rewşa înfazî ya tepişteyanê ke cezaya muebetê giranî girewta ser û nê vatî: “Na mesele têna rewşa kesêkî nîya; ewnîyayîşê Tirkîya yê huqûq, edalet û heqanê merdiman fînena çiman var. Cuya merdimi bimbarek a, cezaya ke dîyenê kesêkî têna ey nê keyeyê ci zî eleqedar kena. Mehkemeya Heqanê Merdiman a Ewropa (MHME) nê rêzgezî esas gena û vana heqê hêvî. MHME vana ke gerek hêvîya tepişteyan bibo ke ê rojêke do vejê teber. Seba ke semedê Birêz Ocalanî heqê hevî nîno caardene no binpaykerdişê heqan o. Rewşa Birêz Ocalanî sembolik a. No têna bi ey sînordar nîyo. Heme tepişyan ke cezaya muebetê giranî girewta heqê înan yenê binpaykerdene.”
Muguçî vist vîrî ke Tirkîya kurdî têna binê nasnameyê “tirkî” de eşkenê bibê wayîrê heqî û na rewşe sey “qanûnê bingeyî de çînhesibnayîş” name kerd û nê vatî: “Çareserîye bi demokrasî û huqûqî bena. Eke nê prosesî de pêaskerdişo huqûqî mebo, ne sîyaseto demokratîk aver şino ne haştîye komelkî bena. Şarê kurdî xo nê qanûnê bingeyî de nêvîneno. Seba ke heqê hêvî bêro caardene gerek reformêko hîra bibo. Heqê hêvî sîyasî nê, huqûqî û merdimîye yo. Eke raşta haştîye yena waştene gerek no heq bêro caardene û serûberkerdişê ceza û înfazî bêro bedilnayene. Heqê hêvî têna meseleya tepişteyan nîya, vîjdanê hemparî yê pêro komelî eleqedar keno.”
