Verfeka Meclîsê Cinîyan ya DEM Partî, Halîde Turkoglu, îfade kerd ke ganî heyetê têkîldarê qanûnê çarçewayî de bêrê awankerdene de cinî sey kerdoxe ca bigîrê û proses teqîb bikerê û wina vat: “Aştîya komelkî bi cinîyan mumkun a. Prosesêko ke cinî tede çinbê, kêm o. Ganî cinî bibê kerdoxê awankar ê prosesî.”
Verfeka Meclîsê Cinîyan ya DEM Partî, Halîde Turkoglu, merkezê pêroyî yê partîya xo de derheqê averşîyayîşanê rojevî de eşkerayîye daye. Halîde Turkoglu, destpêkê qiseyê xo de îfade kerd ke têkoşînê azadîye yê cinîyan seba aştî û seyyewbînîye ya û wina qisey kerd: “No têkoşîn seba aştîye bi vengdayîşê Aştî û Komelê Demokratîk resayo nê merheleyî. Qanûnê çarçewayî ke bi raydayîşêko gird, meclîsî de bi qanûn, rixmê kêmanîyan zî gamêka muhîm bî.”
Halîde Turkoglu dîyar kerd ke sebebê problemê kurdî, înkarkerdişê ziwan û nasnameyê kurdî yo û vat ke qanûnê çarçewayî eşkeno seba çareserîya nê problem bibo gamêka muhîm. Aye vengdayîşê cinîyan kerd ke heyetê ke bêrê awankerdene de ca bigrê û prosesê çimdarîye de bi hawayêko aktîf beşdar bibê. Halîde Turkoglu dîyar kerd ke cinî, şer û teda de tewr zêde zerar vînenê, la rixê heme dejan zî waştişê aştîye ra fek veranêdanê. Maya Nîhat Kazanhanî ke 11 serre yê xo de cuya xo ra bî, vana verê heme çî ma aştî wazenê. Sewbîna cinî yê ke gedeyê xo vîndî kerdê aştî wazenê, cinîyê elewî ke her wext raştê cîyayîye ameyê zî aştî wazenê.
‘Ma do vera heme bêedaletîyan têkoşînê xo bidomnê’
Halîde Turkoglu, îfade kerd ke ganî cinî bibê kerdoxê prosesî û vat: “Aştîya komelkî bi cinîyan mumkun a. Prosesêko ke cinî tede çinbê, kêm o. Ganî cinî bibê kerdoxê awankar ê prosesî. Ma cinî ganî pozîsyonê wanakerdişî de ca bigrê. Ganî komîsyonêkê cinîyan awan bibo û prosesî teqîb bikerê. Têkoşînê aştîye, demokrasiye ra cîya nîyo. Ma do vera heme bêedaletîyan têkoşînê xo bidomnê.”
‘Binpaykerdişê heqan hepîsxaneyan de dewam keno’
Halîde Turkoglu, bale ante binpaykerdişê heqanê girewteyan ser û wina qisey kerd: “Tîya de qalê aştîye bikerê û hepîsxaneyan de bipaykerdişê heqan bibo, no çî nêno qebulkerdene. Bi hawayêko keyfî Îdareyê Çimdarîye veradayîşê girewteyan taloq keno. Waştişê cinîyanê girewteyan nênê caardene. Hunermende Nuarîn ke bade çend serran ame welat Mêrsîn de ame destbendkerdene. Ganî nê caardeyê ke vera hunermendan benê, biqedîyê. Sewbîna ajansî, keyepel û rojnameyê ke vengê cinîyan resnenê komelî zî yene astengkerdene. Ganî nê çî zî biqedîyê.”
25 cinî ameyê qetilkerdene
Halîde Turkoglu, dîyar kerd ke tedaya vera cinîyan hema zî dewam kenê, sebebo sereke zî polîtîkayê mêrdeperestî ê îqtîdarî yê û vengdayîş kerd ke vera nê polîtîkayan têkoşîn do dewam bikero; aye bale ante tedaya vera cinîyanê koçber û multecîyan ser û vat ke ganî hadîseyê tedayan ser o tehqîqat bêrê kerdiş.
Halîde Turkoglu, peynîyê qiseyê xo de îfade kerd ke hetê ke ra hêrişanê Amerîka Îranî ser o tesîrî cinîyan keno û heto bîn ra zî cinî Îranî de raştê dardekerdişan yenê û wina vat: “Prosesê Aştî û Komelê Demokratî o ke birêz Ocalan dayo destpêkerdene, eşkeno aştîye bîyaro Rojhelata Mîyanên e. Lazimîya herême tewr zêde aştîye esta.”
