Endama Heyetê Serekîye ya Partîya Yewîya Demokratîk (PYD) Foza Yûsif dîyar kerd ke bi pêkerdişê mabênê HSD û Hukmatê Sûrîye reyde do heme kemaneyê Sûrîye bêrê pawitene û vat: “Seba çareserî do tu kes teberê çareserî de nênamano.”
10ê adare de mabênê Fermandarê Pêroyî yê Hêzanê Sûrîya Demokratîke (HSD) û Serekê Hukmatê Demkî yê Sûrîye Ehmed el Şera de pêkerdişêk ame îmzakerdene. Pêkerdiş 8 madeyan ra ameyêne pê û ame dîyarkerdene ke do heme heqê bingeyîn yê kurdan bêrê teqezkerdene. Eynê wextî de bêyî ke dîn û nîjadê komelî ra biewnîyê, heqê temsîlkarî û beşdarîyî yê heme sûrîyeyîjan do bêrê teqezkerdene.
Endama Heyetê Serekîye ya Partîya Yewîya Demokratîk (PYD) Foza Yûsif derheqê pêkerdişî de qisey kerd û vat ke do tu kes teberê çareserî de nêmano.
Foza Yûsif ard ziwan ke pêkerdiş esasanê bingeyînan dano dîyarkerdene û vat: “Reyna yeno sehkerdene ke ganî ma problemanê xo bi dîyalog çareser bikerê û ganî polîtîkaya înkarî ra fek veradê. Reyna ma seh kenê ke ma parçeyêkê erdî Sûrîye ra yê û rayîrê çareserî zî destûrêko bingeyîn yê demokratîkî ra vîyareno. Seba rayberdişê nê qeraran komîteyê e do bêrê awankerdene do detayan ser o munaqeşe bikerê.”
Dewamê qiseyerdişê xo de Foza Yûsif bale ant nuqteya dîyîn ya pêkerdişê ke şarê kurd sey şarê orîjînal yê Sûrîye pênase kena û vat ke ganî heqê şarê kurd destûrê bingeyîn de bêrê teqezkerdene. Foza Yûsif vat: “No yeno maneya qebulkerdişê estbîyayişê kurdan ke hetê rejîmê Baasî ra ameyêne înkarkerdene. Seba babetanê nasnameyî bêguman ganî destûrê bingeyîn yê ke do ameyoxî de bêro nuştene no çî tede ca bigîro û heme kesê ke bê nasnamey ê ganî rewşa înan bigîrê çiman û heqê înan bêrê pawitene.
‘Heme kesî ganî agêyrê’
Foza Yûsif ard vîr ke herêmanê Efrîn, Serêkanîyê û Girê Spî wextêko derg ra yo ke îşxal kerdo û nê çîyî ard ziwan: “Seba şarê ma yê Efrîn, Serêkanîyê û Girê Spî xebatêk yena kerdene. Lazim o seba agêrayîşê înan temînat bêro dayene û wexto ke agêrenê zî kerdeyanê qirkerdişê şarî û kulturî bêrê qedîyayene. Na babete hem Neteweyenê Yewbîyayeyan (NY) hem zî bi Hukmatê Demkî yê Sûrîye reyde yenê munaqaşekerdene. Ganî şar bi hewayêko rêxistinkerde agêro erdê xo.
‘Lazim o tu kes teberê çareserî nêmano’
Foza Yûsif bale ant qirkerdişê vera komela elewî û nê qirkerdişê şermezar kerdê. Foza Yûsif wina dewam kerd: “No pêkerdiş tu têkîlîya xo bi rewşa verawe û elewîyan reyde çin o. Nuqteya yewin ya pêkerdişî de yeno sehkerdene ke lazim o heme endamê awankerdişê Sûriya ameyoxî de ca bigîrê. Komelo elewî zî beşêko nê yo. Eynê wextî de helwestê Vakûr û Rojhelatê Sûrîye yê vera qirkerdişî zelal o. Ewro bi des hezaran kesî ke tîya de qirkerdişê elewîyan şermezar kenê. Lazim o tu het teberê çareserî de nêmano.”
Vengdayîşê Abdullah Ocalanî
Tewr peyên zî Foza Yûsîf qala vengdayîşê tarixî yê Rayberê Şarê Kurd Abdullah Ocalanî kerd û wina vat: 1bêguman tesîrê vengdayîşê Rayber Ocalanî rewşa Sûrîye ser o est o. Seba ke vengdayîşê ey xerîtaya nê seserrî yo û dano dîyarkerdene ke kam sîyasetê şerî de israr keno, o do teqez vîndî bikero. No vengdayîş herkesî silayneno rêbaza çareserî. O semedî ra merdim eşkeno vajo vengdayîşê Rayber Apoyî rewşa ke xetimîyaya akerd û heme hêzê herême neçar mendê ke xo bibedilnê.”
