Seba yadkerdişê rojnameger Ersîn Yildiz û şermezarkerdişê bombakerdişê rojnameyê Ozgur Ulkeyî çalakî ameye kerdene û wina ame vatene: “Ersîn Yildîzan ra heta Ezîzan rêça heqîqetî dewam kena.”
Rojnameyê Yenî Yaşamî, Komela Rojnamegeran a Dîcle Firatî (DFG) û Komela Rojnamegeranê Cinî a Mezopotamyayî (MKG), bi munasebetê serrgêra bombakerdişê Rojnemayê Ozgur Ulkeyî yaa 31., semta Kadirgayî ya qezaya Fatîhî ya Stenbolî ku awanîya rojnameyî uca de bîye, çalakîya protestoyî û yadkerdişê Ersîn Yildizî ame kerdene. Xeylê rojnameger, temsîlkarê sendîkayan, partiyê sîyasî û rêxistinê komelê sîvîlî beşdar bîyê.
Programê vîrardişî de dovîzê manşetanê Ozgur Ulkeyî sey “No adir do şima zî veşno” , “Çapemenîya Azade şao azad” , “Ma sere nêtewnenê” û fotografê rojnameger Ersîn Yildiz ke hêrişî de cuya xo vîndî kerdbî ameyê girewtene. Reyna pankartê “Çapemenîya Azade nêyena bêvengkerdene” ameyê girewtene û sloganê “Çapemenîya Azade nêyena bêvengkerdene” ame vatene.
‘Heqîqet teqezkerdişê aştî yo’
Xebatkaranê verê yê rojnameyî ra sîyasetmedar Gultan Kişank yadkerdişî de qisey kerd û vat: “Seba ke nê rîpelê tarîyî reyna nêabî, ma heqê xo yê xovîrranêkerdişî şuxulnenê. Ozgur Ulkeyî bi sloganê ‘Do rastîyî tarîtî de nêmanê’ dest bi weşanî kerd. Çi heyf ke fermana serekwezîra ê wextî Tansu Çîllerî heme hûmarê rojnameyî ameyê komkerdene. Keedkarê çapemenî û heme kesê ke heqîqetî ra bawer ê, rixmê heme zilmî zî heqîqetî nuşt. Tansu Çîllerî fermanê bombakerdişê rojnameyê Ozgur Ulkeyî da. Nêmseyê şewe rojnameyê ma bomba kerd. Waşt rojnamegerê ke heqîqetî ra bawer kenê, biqedînê. Labelê tarîxî reyna mojna ke yê ke heqîqetî nuştêne nêameyê çinkerdene. Nê adirî bi serran nê welatî veşna. Heqîqet, teqezkerdişê aştî yo. Heqîqet çend vejîyo orte ma do hende nêzdîyê aştî bibê.”
‘Faîlî nêameyê muhakemekerdene’
Endama Komîteyê Rayberîya Merkezî ya ÎHD’yî Eren Keskîn zî wina vat “Seba rojnamegerîya Çapemenîya Azade ma xeylê însanê xo vîndî kerdê. Înan ra yewe zî Gurbetellî Ersoz bîye. Tena çapemenîya Azade vengkerdişê dewan, cînayetê ke kerdoxê înan dîyar nîyê dayênê. Teqînêko zaf plankerdene û organîze bi. A roje ra heta nija ma tîya de yê. Kesêk zî nêame muhakemekerdene. Faîlî nêameyê eşkerakerdene.
‘Ersînan ra heta Ezîzan…’
Metnê eşkerayî hetê xebatkara Rojnameyê Yenî Yaşamî Ezgî Çardirci Karabey ra ame wendene. Ezgî Çardirci Karabey dîyar kerd ke înan şahidîya her gama têkoşînê mendiş û nêmendişî yê şarî kerdo û heme hêrişê vera Çapemenîya Azade bêencam mendê û wina vat: “Çapemenîya Azade tu wext bêvend nêmende. Serrê 90î serrê tarî bîyê. Lîsteya embazanê ma ya ameyê qetilkerdene roje bi roje derg bîye, embazê ma yê ke şîyêne xebere, la apey nêagêrayêne est bîyê. Destbendkerdiş, îşkence, girewtiş, sirgun, dewa, KHK, qeyûm û ûsn. tu wext kêm nêbîyê. Dewlete o wext şarê kurdî rê çi rewa bidîyêne, eyn çî seba Çapemenîya Azade kerdêne ke veng, çim û goşê înan bîye. Labelê Çapemenîya Azade her tim nê tradîsyonî domna. Ma Apê Musayan ra heta Gurbetellî Ersoz, Ersînan ra heta Ayfer, Denîz, Nûjîyan, Nagîhan, Gulîstan, Hêro, Nazim, Cîhan, Ezîzan ra musayî. Ma mamosteyê xo Huseyîn Aykolî ra musayî ke bi rojan o nêweşxane de xover dano. Senî ke ma şahîdîya heme dejanê nê welatî kerda, ma do demêko ke cuya têduşt, azade û demokratîk yena awankerdene zî şarê xo het de bibê. Ma do reyna vengê înan dinay reyde pare bikerê.”
Tewr peyên beşdaran qerenfilî ronayê cayê qirkerdişî û programê yadkerdişî qedîya.
