Çarçewaya paştîdayena Rojava de elewîyan Pirsûs de seba aştî çilayî veşnayî, mesajê xo de vat: “Rojava de ma kerbelaya newîye nêwazenê.”
Komela Elewîyana Demokratîkan (DAD), çarçewaya paştîdayena Kobanî de vera dorpêç û ambargoyî qezaya Pirsûs/Suruç a Riha Meydanê Cumhurîyetî de eşkerayîya çapemenî daye. Pankartê “Lazkîye ra heta Rojava, verva Kerbelayanê neweyan vinde” akerd. Sey Dêrsim, Semsûr Xeylê şaristanan ra Pîr û Dayîkê elewî, Serekê Federasyonê Elewîyanê Bektaşî (ABF) Mustafa Aslan, Sereka Komelaya Kulturê Elewîyan (AKD) Seher Şengullu Yilmaz, Parlementerê DEMPartî Omer Ocalan û xeylê kesî tewrê Eşkerayî bîy.
Vernîya eşkerayî de Ocaxa Aguçan ra Pîr Înanç Doludar gulbang daye. Dima seba aştî 40 hebê çila ameyê wekerdene.
Eşkerayîya Kurdkî Hemsereka Pêroyî yê DAD’î Mercan Gul, Tirkî ci Hemserekê Pêroyî yê DAD’î Zeynel Kete’yî wende.
Eşkerayî wina ya:
Seba Rojava ma veng vejenê
“Ewro bi hêzê felsefeyê Xizirî ma Riha Pirsûs de ameyê têhet, verva şerê peroyî yê Sûrîya û Rojava de rijnayîşê merdimîye ke zaf gird qewimîya yo ma veng xo berz kenê. Tewr bedelo gird cinîyan, serdî ver gedeyan cuya xo vîndî kerd, kurdî, elewî, durzî, ermenî, erebî, suryanî û şaranê mazlûmî yê herême reyde ma ca gênê û eşkera îfade kenê.”
Şer tena bi bombayan nêbeno
Deryayê zulimkaran dest dayo yewbînan, cografyaya qedîme yê merdimîye de mazlûman ser o zulim kenê. Ewro welatê Sûrîye de şerîatperestî, dînperestî, yewperestî, Selefî û zîhnîyetê neyarîya cinîyan; cuye, têduştî û azadî kenê hedef. Wazenê iradeyê cinîyan çin bikerê, beden û nasnameyê înan bikerê binê kontrolê xo, no zîhnîyet merdimîye, bawerî, wijdan, exlaq û kulturê Îslamî ra tu eleqeyê xo çin o.
Wa polîtîkayê şerî bêro vindarnayene
Rojava de bi pêşengîya cinîyan îradeya cuye azade, tena yew herême ney, bîyo hêvîye ke seba pêroyî Rojhelatê Mîyanênî û heme şaranê bindestan. Hêrişê ke na hêvî kenê hedef, sewbîna hêrişê aştî û cuya pîyabîyayîşî kenê. Ma verva nê hêrişan bêveng nêmanenê. Bêvengî hemkarîya qirkerdene yo. Pîrê elewîyan, dayîkî û canê ke zanayîş û erkanê raya heqê ramenê ma îta ra bi hawayêko eşkera vengdayîşê aştî kenê: “Wa polîtîkayê şerî bêro vindarnayene. Çekî wa vinderê, şarî qisey bikerê. Cuya cinî û gedeyan wa nêbo babetê bazarî. Aştî yew tîp nîyo zafrengiya. Aştî ters nîya, azadîya.
Waştena Aştî
Aştî; ciwîyayîşêko cinîyan teslîmê tarîtî nêkeno. Aştî hemê beşê komelî bi bawerîya xo, ziwan û kulturê xo ciwîyayîş o. Estbîyayîşê Erje komelî yo. Aştî wexto ke komelî bo maneya xo est a. Seba hewcedarî bi pê ameyîş est a. Welato hempar de seba ke têduşt û welatije azad na komare de ma biciwîye ganî pêameyîş bêro viraştene. Seba aştî domdare bo ganî gamê şênberî bêrê eştene.”
Kerbelayanê neweyan ra vanême ney
Verva zulmî bêhetî çin a. Hetê cuye bîyene tercîh nîyo, berpirsyarîya. Verva şerîetî, şerî û neyarîya cinîyan; ma hetê cuye, têduştî û aştîye yê. Lazkîye ra heta Rojava ma kerbelayê newan nêwazenê. Semedê dorpêçê cuya merdiman kewta talûke seba na zehmetî wedarîyo ganî berî akerê hetkarî merdimî bireso înan.
‘Verva zaliman ma kişta mazlûman de
Dima sereka AKD’î Seher Şengullu Yazici qisey kerd û vat vernîya çimanê dinyade gonîya şaranê Sûrîye yena rijnayene. Mexdûrê qirkerdene tewr zêde cinî û gedeyê. Sûrîye de şarê mazlûmî rastê zulmî yênê. Cinî yenê remnayene, bazarê koleyan de yenê rotene, rastê tecawûzî yenê. Vengdayîşê dinya kena endî nê zulmî rê çimanê xo megîrê. Ma elewî bi bawerî û vindertena şorişgerî verva zaliman kişta mazlûman de cagirewtişê xo ma do dewam bikerê.”
‘Wa gamê demokratîkî bêrê eştene’
Serekê Pêroyî yê ABF’î Mustafa Aslanî vat Sûrîye de 13 serrî yo verva heme bawerîyan zulim yeno kerdene. Rojava de kurdî, xiristîyanî, elewî û durzî qetilbenê. Sûrîye ewleyîya şaran çin a, çeteyê selefî, sunîyê ke sey înan nêfikirênê zî kenê hedef. Aştî, wayûbiratî bi fek nêbena. Paştîdayena kiştoxan kenê ey zî şinê elewî û kurdan kişenê. Ganî bilez gamê demokratîkî bêrê eştene.”
Badê qiseykerdişan deyîrî ameyê vatene.
