Haydar Dîljenî ke 36 serrî Swêd de mamostayîya kurdkî kerda, bale ante muhîmîya perwerdeyê bi ziwanê dayîke ser o û vat ke ganî kuçe, bazar, dolmîş û nêweşxaneyan de bi kurdkî qisey bibo.
Nuştox û perwerdekar Haydar Dîljen 36 serrî Swêd de mamostayîya kurdkî kerda û 20 ra zêdeyêr kitabê dersan nuştê. Serra 2012î de hetê Şaredarîya Vasterasî ra sey “mamostayê serre” ame weçînayene û Xelata Pedagojî girewte. Dîljen beşdarê Fuarê Kitaban ê Amedî yê 10. zî bîbî.
Dîljen Amed de mamostayê edebîyat û tirkî bî; demê cuntaya 1980î de ame destbendkerdene û îşkence dî. Serra 1983î de bar kerd Swêd û 1986 ra nata mektebanê Vasterasî de dersê kurdkî dayî. Dîljenî vat ke Swêd de kurdkî mîyanê 10 ziwanan de ya ke perwerdeyê înan yeno dayene û 12 hezar domanê kurdan beşdarê dersanê kurdkî benê ke hewte de reyêk yenê dayene. Goreyê ey, Almanya de nêzdîyê 1,5 mîlyon kurdî ciwîyenê, la tena 3 hezar wendekarî beşdarê dersanê kurdkî benê: “Swêdijî vanê ‘kesê ke ziwanê xo nêzano, nêşeno ziwanê ma bimuso.'”
Dîljenî vat ke mamostayîya kurdkî cuya ey de çîyo tewr rind o: “Domanan heme hewte o dersê kurdkî yê yew saetî pawitêne. Wendekarê mi zafane kênekî bî; kênekî zaf wazenê ziwanê xo yê dayîke bimusê.” Dîljenî dîyar kerd ke kitabanê xo de rolê cinîyan ê komelî zî domanan rê dano şinasnayene.
Dîljenî venga dayîk û pîyan da ke domananê xo reyde bi kurdkî qisey bikerê: “Eke kurdkî bi fermî û huqûqî mektebê verênî ra heta unîversîte nêbo ziwanê perwerdeyî, wextî reyde vindî bena. Ganî ma heqanê huqûqîyan qezenc bikerê.” Dîljenî venga her kesî da ke kuçe, bazar, dolmîş, nêweşxane û her ca de bi kurdkî qisey bikero.
