Hemserekê Komîteya Enerjî ya Rayberîya Xoserî ya Vakur û Rojhelatê Sûrîye Zîyad Rustemî tehlukeyê verba Awbendê Tişrînî mojna û hişyarî da ke eke Awbend bixeripîyo, şar do bê enerjî û bê awe bimano.
Awbendê Tişrînî serra 1999 de qedîyayo û dest bi xebate kerdo. Awbendê 50 kîlometreyî dûrîyê bajarê Helebî de Royê Firatî ser o yo. Lazimtîya bingeyînê şarê herême sey awa şimitişî, viraştişê enerjî û awdayîşî nê Awbendî ra yenê temînkerdene. No awbend, awbendo tewr girdo ke Royê Firatî ser o yo. Berzîya awbendî 40 metreyî yo û bi 6 turbînan kapasîteya ey a viraştişê enerjî 630 MW ya. Cayê stratejîkî yê Awbendî zî zaf muhîm o. Awbend, mabênê bajaranê Minbic û Kobanê de rayîrê ravêrdişî ya.
Hişyarîya Zîyad Rustemî
Zîyad Rustemî derheqê hedîseyan de ajansê MA’rê qisey kerd û va ke awanîyê xizmetî yê Awbendî ameyê hedefgirewtiş. Rustemî dîyar kerd ke riyê hêrîşan ra Awbendî zerar dîyo û dîyar kerd ke cayê şarî yê ke girêdayeyê Rayberîya Xoserî û bajaranê bînanê yê Sûrîye yê, tehlukeya bêaweyî û bêenerjîye de yê.
Rustemî wina dewam kerd: “Nika Awbendê de 2 mîlyar metrekûp awe est a. Eke xirabîyayîş yan zî rijîyayîş bibo, mabênê aye û Royê Firatî 80 kîlometreyî est o û uca de zî 14 mîlyar lître awe est a. Ro nêeşkeno na awe wedaro û nêeşkeno ravêrno. Royê Firatî de 8 berî est ê û ma heme akerê zî sanîye de 18 hezar metrekûp awe eşkena ravêro. Eke ma 2 mîlyar metrekûp awe berz bikê Firatî ser, tîya do birijîyo. Tîya de zaf cayê şarî est ê. Şar do binê awe de bimano. Vîndîbîyayîşê Tişrînî do Awbendanê bînan zî bixerepno. Tena Tişrîn nê, Firat zî nê ra tesîr gêno. Awbendê Tebqa û Baasî zî do bikewê tehluke.”
