ÇEWLÎG – Hemsereka DBP Çigdem Kiliçgun Uçar û temsîlkaranê DBPyî dewa Mirunî ya Xorxolî de şarê xo reyde kom bîyî. Uçare bale ante prosesê aşîtî ser û vat: “Vera pêro kemanîyan, vera pêro kesanê ke aştîye nêwazenê û cengî ferz kenê, ma vera înan aştîye ser o, vera înan ciwîyayişê pîya yê şaran ser o yew roşnî bivînê, pilkerdişê na roşnîye û pilkerdişê nê emegî mesulîyetê ma yo tarîxî yo”
Hemsereka Pêroyî ya Partîya Herêmanê Demokratîkan (DBP) Çigdem Kiliçgun Uçare çarçewaya têhetameyîşanê “Ma şarî reyde qalê aştîye kenê” de ewro Çewlîg de temsîlkaranê çapemenîya cayî û dezgehanê komelê sîvîlî reyde ameyî têhet. Heyet badê nê kombîyayîşan ra derbazê qezaya Çewlîgî Xorxorî bî û dewa Mirunî de şarî reyde kom bîy. Îta de Çigdem Kiliçgun Uçarê derheqê prosesî de qisey kerd.
Ma pîya yew roşnî bivînê û na roşnîye pîl bikerê
Çigdem Kilicgun Uçare vat qanûnê koke yo ke ma zî bînê ey îmza kerd, kêmanîyê xo helbet est ê û wina domna: “No qanûnê koke, nê welatî de seba ke formê elaqaya dewlete ya vera kurdan bibedilno, hîna raver zî formê elaqaya dewlete ya vera komelî bibedilno yew destpêkerdişo tarîxî yo. Seba ke ma bieşkîyê çîyanê neweyan qisey bikerê û çîyanê neweyan awan bikerê, ganî na merhaleya pêrodayişî ya ke nê welat û şarê nê welatî ey rê mehkûm bîyê, biqedîyo. Yew heto tewr kêmî yê nê qanûnî no yo ke, qanûnê koke bi sebebê meseleye ser nêvinderto, teyna elaqadarê netîceyanê ci bî. Neticeyê ci çi bî? Têkoşîno çekdarî. Yew qanûno ke bala xo teyna da uca. Bi tewr esasî kemanîyê qanûnî zî no yo. La ma zî vanê ke vera pêro kemanîyan, vera pêro kesanê ke aştîye nêwazenê û cengî ferz kenê, ma vera înan aştîye ser o, vera înan cîwîyayişê pîya yê şaran ser o yew roşnî bivînê, pîlkerdişê na roşnîye û pîlkerdişê nê emegî mesulîyetê ma yo tarîxî yo.”
‘Ma endî vanîme ke heqê ma bîdîyê ma’
Çigdem Kiliçgun Uçare qiseykerdişê xo wina qedêna: “Hêm şertanê giranan ê Zîndanê Îmrali de birêz Abdullah Ocalan est o, hêm zî şertanê giranan ê koyan de ke gerilayî est ê û ey nê şertan de Rojhelatê Mîyanî de rayêka demokratîke rayrabenê û nêwazenê Tirkîya neweye de şarî, komelî û bawerî bê demokrasî bimanê. Hêm Rojhelatê Mîyanî rê hêm zî Tirkiya rê sîyesetêko newe, fehmkerdişoko newe û polîtîkayêka newîye lazim a. Ma zî vanê ke no welat de 100 serrî yo ke ma ra ameyo diznayene, heme heqê ma ameyê girewtene. Ma endî vanîme ke heqê ma bîdîyê ma. Kamîya ma, ziwan û kulturê ma bêro naskerdene.”
Bernama persan û cevaban ra dima qedîya.
