ÇEWLÎG – Ma derheqê problemanê binawanîye, rayîr û mektebê mezra Alavûze ya ke girêdayeyê dewa Alpîranê Kanîreşîya dewijan de qisey kerd. Dewijan wina vat: “Seba ke ma rayanê xo danê DEM Partî, dewlete dewa ma rê xizmete nêkena. Nê problemî seba cuyayena ma astengê.”
Qezaya Çewlîgî Kanîreş de problemê Mezra Alavûze ya ke girêdayeyê dewa Alpîranî ya nênê çareserkerdene. Problemê esasî yê binawanîye, rayîr û mektebî yê. Binawanîya mezra nêameya viraştene; awa kanalîzasyonan mîyanê dewe de û dereyê hetê banan de yena pêser. No semed ra zî dewede boya pîse yena. Na boye zî bena sebebê nêweşîyan. Seba ke domanî nêşirê tede kay nêkerê û nêweş nêbê, dewijî mecbur manenê ke domananê xo nêverdê teber. Eke berdê deber zî mecbur kontrol benê ke nêkûyêne a awa pîse.
Heto bîn ra dewe de mektebo verên serra 1985î de ameyo viraştene, dewijî vanê a serra ra hetanî nika dewlete yew tamîr zî nêkerdo û ayra mekteb rijîyaye yo. Ser ro zî lojmanê mamostayan sey cayê perwerdeyî danê xebitnayene û goreyê dewijan no ca zî tew hîjyen nîyo. Dormeyê Mektebî akerdeyo, yew tedbîro ke gedeyan tehlukeyenê teberî ra bipawo çin o. Dormeyê mektebî de zî pakîye çin a, komir, çop ameyo rişnayene, serê weşîya domanan de tesîr keno. Eynî tewir de yew tuwalet est o, wendekarê kênek û lacekî yew tuwalet xebitnenê. Nê pêro ameyê vatene.
Reyna problemê raye zî nêno çareserkedene. Raye tenga, ameyîş û şiyayîşan de qezayî virazînê. Çike raye zaf teng a. Ma derheqê nê probleman de dewîjan de qisey kerd. Dewijî vanê ma derheqê nê pirobleman de zaf cayan ra vato û dîlekçeyî dayê la yew çare nêameyo vînayene. Dewijan da zanayene ke çare nêdîyayişê nê pirobleman sîyasî yo. Eke nêameyo nuştene zî fekî ra tim vanê, “şima rayanê xo danê DEM Partî, ma çîrê problemenê şima rê çare bivênê.”
‘Mekteb de piroblemê hîjyenî, germkerdişî û perwerdeyî estê’
Dewijan ra Ferît Karabag vano dewê de zaf problemî estê la xizmeta ke înan rê ameya viraştene çin a. Ferît Karabagî da zanayene ke problemê înan o verên raye ya û qiseyê xo wina domna: “Ez 60 serrî ya, wextoke ez doman bîya na dewe de no mekteb ameyo viraştene. A serre ra hetanî nika mektebî rê hînî yew tamîr nêameyo kerdene û nika domanê ma nê mektebî de wanenê. Mekteb de sinifa 1e ra heta Sinifa 4îne wendekarî perwerde vinenî. Seba ke mekteb qijo lojmanê mamostayan zî sey cayê perwerdeyî xebitnenî. Mekteb dê 1 ra heta sinifa 4î de wendekarî est ê la 2 mamostayî teyna est ê. Mekteb de wendekarî mîyanê perîşanîye de yê û problemê hîjyenî, germkerdişî û perwerdeyî yê cîdî est ê.”
‘Nêweşî ya zaf xirabe mîyanê dewe de vila bîya’
Ferît Karabagî dima ra zî behsê problemê binawanîye kerd û vat: “Dewa ma de cayê kanalîzasyonî çin o. Mîyanê dewe de yew dere esto ke awe tira veyrena, verê ma nê derî ra awa werî girewtêne, desmaj girewtêne. Nika awa kanalîzasyonî yena nê derî. No semed ra zî boye zaf yena û na boye ra nêweşîya zaf xirabe mîyanê dewe de vila bîya. Dewijî boye ra nêeşkenê ber û penceranê xo akerê. Eynî tewir de domanî tim vênenî tede kay kenî û bi hawayêkî nêweş benî.”
‘Sebake ma raye danê DEM Partî dewlete ma rê xizmete nêkena’
Ferît Karabagî da zanayene ke dewlete dewa înan rê yew xizmete nêkena çike hetê sîyasetî ra nêzdî bena, wina vat: “Na herêma ma ra pêro vanê herêma Kêşî. Dewlete na herême rê hîç xizmete nêkena. Ma ke sebebê ci pers kenî encûmenê înan naye vanî, ‘Rayê xo dayê kamî ey şima rê xizmete bikerê’ û seba ke ma rayî dayê DEM Partî ma ceza kenî. Ma ameyê yew astêka henêne ke endî na dewe de nika jiyan zaf zehmet o. Tîya ra bi wesîleyê şima vengdayîşê ma seba dewlete o yo ke, wa mesulîyetanê xo bîyaro ca.”
‘Boya pîs û pîslîxîye ra domanê ma tim nêweşê’
Turkan Karabage ke vat dewe de boya pîse ra nêeşkenê ber û penceranê xo akerê û vat: “Boya pîse û pîslîxîye ra domanê ma tim nêweşê. Eynî tewir de rayê dewe pêro çalê. Hetanî Şonê merkezê yenê rîyê çalan ra erebeyî xirabe benî. Dewe ma de xizmete çin . Ma wazenî dewa ma rê xizmete bêro.”
‘Raya xo bidê ma, ma xizmete bidê şima’
Mustafa Başî zî piroblemê binawanîye, rayîr û mektebî ra qisey kerd û wina vat: “Şarê ma nê pirobleman ra eman kerd o. Ekê wina dewam bikero şar mecbur dewanê xo caverdano şino. Seba kê yew xizmete na dewe rê çin a. Derheqê nê probleman de ma zaf rayan muracatî kerdî. Cewabo ke danê ma wina yo, ‘şima raya xo bidê ma, ma zî xizmete bidê şima.’ Ma zî nê halî qebul nêkenî. Dewlete mecbura xizmete bikero.”
