Anqara – Parlamenterê Amedî yê DEM Partî Serhat Eren çalakîya vera astengkerdişê veradayîşê tepişteyanê sîyasîyan ê cinîyan de qisey kerd û dîyar kerd ke Heyeta Îdare û Çimdarîye ya Zîndanan vera prosesî têgêrena û va: “Rayîrê aştîye akerdişê beranê zîndanî ra vîyareno.”
Federasyonê Komeleyanê Paştdayîş û Pêserardişê Merdimanê Tepişte û Hukimwerdeyan (TUHAD-FED), vera muameleyanê Heyeta Îdare û Çimdarîye ya Zîndanan ke veradayîşê cinîyanê tepişteyan asteng kena, verê Wezaretê Edaletî de eşkerayîye daye. Endam û temsîlkarê partîyanê sîyasîyan, dezgehê demokratîkî, sazîyê huqûqî, parlamenterê DEM Partî yê Amedî Serhat Eren û xeylê kesî tewrê eşkerayîye bîyî. Eşkerayîye de pankarta “Ma vera astengkerdişê veradayîşê tepişteyanê sîyasîyan nobet de yê” ameye akerdiş û fotografê cinîyanê tepişteyan ê ke veradayîşê înan yeno astengkerdiş, ameyî berzkerdiş. Girseyî dirûşmeyê “Tepişteyê sîyasîyî rûmetê ma yê” û “Biciwo xoverdayîşê zîndanan” ameyî vatene.
‘Aştî a ya ke merdimî semedê fikar û vatişanê xo nêrê cezakerdene’
Metnê eşkerayîye hetê Endama OHDî Berfîn Babaogluye ra ame wendene. Berfîn Babaoglu dîyar kerd ke heta bêhuqûqîya zîndanan de biqedîyo ê do têkoşînê xo dewam bikerê û va: “Eke welatêk de qalê aştîye, sîyasetê demokratîkî û pîyabîyayişê komelkî yeno kerdene, gamê tewr şênber zîndanî yê. Cinîyê tepişteyî ke bi serran o zîndan de yê û ser de zî cezaya înan bi awayêko vera huqûqî qedîyaya, na rey veradayîşê înan bi qeraranê kêfî yê Heyeta Îdare û Çimdarîye ya Zîndanî yeno taloqkerdiş. Aştî tenê bi qedîyayîşê şer û pevçînan nîya. Aştî a ya ke merdimî semedê fikar û vatişanê xo nêrê cezakerdene. Heto bîn ra qalê aştîye bêro kerdene û heto bîn ra zî veradayîşê tepişteyan bêro astengkerdiş nêheqîyêka girde ya. Ma tîya ra veng danê; verê ci zîndanê Sîncanî û heme zîndanan de tepişteyê ke înfazê înan temam bîyo, ganî bêrê veradayene û astengîyê verê veradayîşê înan bêrê wedaritene. Heta ke embazê ma bêrê veradayene, sepanê vera huqûqî yê zîndanan de biqedîyê û merdimî semedê fikranê xo nêrê cezakerdene ma do têkoşînê xo dewam bikerê.”
‘Na heyete vera prosesî têgêrena’
Parlamenterê DEM Partî yê Amedî Serhat Erenî zî dîyar kerd ke ê verê Wezaretê Edaletî yê ke vera bêhuqûqîye çimanê xo gênê de eşkerayîye danê û wina qisey kerd: “Heyeta Îdare û Çimdarîye bi awayêko vera huqûqî veradayîşê tepişteyan asteng kena. Na heyete vera huqûqî bi hewayê întîqamgirewtişî têgêrena. Nê kerdeyî vera prosesî yê. Na heyete vera prosesî hereket kena. Rayîrê aştîye akerdişê beranê zîndanî ra vîyareno. Ma Wezaretî rê veng danê ke vera sepananê na heyete bikewo têgêrayîş û tehqîqat bido destpêkerdene. Eke henî nêkerê ma do vera na heyete dewa abikerê. Semedê veradayîşê tepişteyanê sîyasîyan pawitoxê kamî tesdîq û tespîtî yê? Ganî demildest tepişteyê sîyasîyî bêrê veradayene û heta embazê ma azad bibê ma do têkoşînê xo dewam bikerê.”
Eşkerayîye bi berzkerdişê siloganan qedîyaye.
