Hemsereka DBP’yî ya Pêroyî Çîgdem Kiliçgun Uçar, çalakîya cinîyan a Wanî de qisey kerd û va ke Abdullah Ocalan cayêko 12 metrekareyî de seba ameyoxê welatî çareserî peyda keno.
Tevgera Jinên Azad (TJA), Wan de bi sloganê “Cinî ver bi azadîye ray ra şonê” rayîrşîyayîş organîze kerd. Polîsan hêrişê rayîrşîyayîşî kerd û tehdaya xeylê cinîyan kerd û ê destbend kerdê.
Badê rayîrşîyayîşî şar vera awanîya Rêxistina Bajarî ya DBP’yî de ame têhet û pankartî akerdê. Tîya de sloganê “Bijî Serok Apo” û “Jin, jiyan, azadî” ameyê vatene.
Uçar ra verba hêrişê polîsan reaksîyon
Hemsereka Pêroyî ya DBP’yî Çîgdem Kiliçgun Uçar çalakî de qisey kerd û hêrişê polîsan şermezar kerd. Uçar vat: “Seba ke ma şî û slogan eştê Tirkîya parçe bîye? Wexto ke kurdî û cinî şonê û waştişanê xo anê ziwan welat parçe beno? Nê welatî şima parçe kenê.”
‘Ocalan seba ameyoxê welatî çareserîyan peyda keno’
Uçar derheqê komployê 15ê sibate yê de ke Rayberê PKK’yî Abdullah Ocalanî ser o yo qisey kerd û wina dewam kerd: “Kam nê welatî de cayêko 12 metrekareyî de seba ameyoxî çareserîyan peyda keno? Rayberê Şarê Kurdî rêzdar Ocalan nê keno. Ma sey cinîyan ma do bibê yê ke perspektîfê aştî û perspektîfê çareyê demokratîkî ramnenê.”
Uçarî qiseykerdişê xo de wina dewam kerd: “Çimê heme şarê Tirkîya beyanatê Ocalanî de yo. Çunke uca de hêvî, aştî û pîya ciwîyayîş est o. Şaro ke reyna seba qeyûman kuçeyî terk nêkerdî, şaro ke tecrîdî ra hepis ra surgûnî ra vengê xo berz kerd, seba Tirkîya hêvî yo.”
Badê beyanatî sloganê “Bijî Serok Apo” ame vatene.
