Cevdet Konak zulmo ke nika bi destê çeteyanê HTŞ û SMO’yî serê Rojava de yeno ramitene xerîb nêvîneno, nas vîneno û vano: “Şarê Dêrsimî nê zulmî rind zano. Raştîya Rojava raştîya ma ya û ma her hetî ra lewê şarê ma yê Rojava de yê.”
Hemşaredarê Şaredarîya Dêrsimî Cevdet Konak o ke bi qeyûm wezîfeyê xo ra amebi durîvistene prosesê Aştî û Komelê Demokratîkî ke mabênê kurd û dewleta tirkan de yeno ramitene û rewşa Rojava ser o ajansê ma rê qisey kerd. Hêrişê çeteyanê HTŞ û SMO’yî yê ke vera Rojava yenê ramitene, înan ser o qisey keno û bibo nêbo ano qirkerdişê Dêrsimî ra girêdano.
Her çiqas ke dewlete bi destê qeyûmî wezîfeyê ey, ey destî ra girewto zî o seke serê karê xo de bo henî nêzdî beno. Her tim qomê xo de yeno ju ca, halê û mezatê şarê xo perseno.
Cevdet Konakî aştî û hêrişê ke vera kurdan yênê ramitene, înan ser o ajansê ma re qisey kerd.
‘Welatê xo ser ceng dame’
Seserre ra zêdêyêr o kurdî Rojhelatê Mîyanênî de vera îqtidaran xover danê ke cuya xo azad biramê. Cevdet Konak zî seba ke ma na roje fam bikîme, verî behsê tarîxê Dêrsimî keno û wina vano: “Kurdî seserre yo ke zereyê înkarîye de rê. Şêx Seîd û Sey Rizayî darde kerdî. Zerê nê 50 serran de seba ke kurdan aştîye waşte xeylî însanê ma ameyî kiştene. Seba raştîye û herra xo, zonê xo da pêro. Rojava de kurd, ereb, durzî, suryan û armenî ameyî pêser, weşîya xo demokrasî ser o viraşte. Şaranê dinya Rojava nas kerd.”
Cevdet Konak proseso newe yo ke mabênê kurdanê vakurê Kurdîstan û dewleta tirkan de yeno ramitene, ey ser o zî vatena xo wina girêdano: “Hetê ra kî dewleta tirkan û kurdan seveta aştîye ameyê lewê jumînî. Kurmancan va ke, ma xeyle serrî yo ke, waûbiratîye wazenîme. Domananê koyî, tifangê xo vesnayî.
Demokrasî û hiqûq teyna kurdan rê nê, nê welatî de kam ke weşîya xo ramneno, înû pêrûne rê kî wazenê. Dewleta tirkan, va ke komîsyon esta, şî lewê rayberê kurdan va endî waûbiratîye bêra. No hûkmat çîye raştîye nêkeno, nînû tornê Osmanlîye. Nînû Lozan de ma xapitîme, ma rê bîndestîye arde. Des rojî yo ke Helebî vînenîme, nika Rojava tengîye der a. Hetê de vanê ma birayîme, heto bîn ra adir varnenê serê Rojava. Na qeyde ra aştîye nêbena. Saro Kûrmanc, her cayî de vengê xo vezeno. 50 serrî yo ke, seveta heqanê xo danê pêro. Bînê herre de bê kefenî estê.”
‘Qomê Dêrsimî lewê Rojava der o’
Cevdet Konakî peynîya qiseykerdena xo de seba Rojava wina vano: “Ma zon û îtîqatê xo ra, raştîya xo ra û kulture xo ra peyser nêvîndenîme. Sarê koyê Dêrsimî 1938î de qirim dîyo. Domanê Dêrsimî, cenî, camord û kamîlê Dêrsimî qir kerdî. Sarê Dêrsimî nê zulmî zaneno. Sarê Dêrsimî vano, ‘ma hetê sarê Rojava derîme. Rojava welatê ma yo, herra Rojava herra ma ya. Raştîya Rojava raştîya ma ya. Înû bîrayê ma yê, cîranê ma yê. Înû mîsayîvê ma yê, kewrayê ma yê. Teyna nîyê.”
