Hemsereka Pêroyî ya DBP’yî Çîgdem Kiliçgun Uçare ard ziwan ke seba ke dewlete game nêerzena proses kewno tengayî û vat heto ke haştîye wazeno xerîtaya ci ya rayîrî hazir a.
Hemsereka Partîya Herêmanê Demokratîkan (DBP) Çîgdem Kiliçgun Uçar rewşa prosesê çareserî erjna. Çîgdem Kiliçgun Uçare ard ziwan ke têrgêrayîşê kurdan xeylê wext o semedê haştîye û çareserî têkoşîno biisrarî keno û vat dewlete vera nê semedê prosesî game nêerzena.
Çîgdem Kiliçgun Uçar nê vatî: “Gamê dewlete hema zî bewlî nîyê. Rayber Apoyî vat herinda têkoşînê çekdarî de wa sîyaseto demokratîk bêro kerdene. Hema bewlî nêbîyo ke dewlete vera nê senî yew polîtîka do rayra bêro. Ganî dewlete gaman pêtan bierzo la nê gaman çew nêeşkeno têna dewlete rê biverdo, ganî hêzê demokratîkî zî prosesî zemînê komelkî de hêzdar bikerê. Şima çend hêzdar bibê dewlete hendê game erzena. Ronayîşê komîsyonî muhîm o la cesaretê ci kêm o. Pêvînayîşê Birêz Ocalanî semedê prosesî krîtîk o.
Çareserîya demokratîke ya semedê meseleya kurdan, temînatê demokrasîya Tirkîya yo. Seba ke heqê hêvî nîno caardene no hem semedê Birêz Ocalanî hem zî semedê pêro tepişteyanê sîyasîyan astengek o. Zîndanê Îmrali de yo ke dewlete semedê sembolê bêçareserkedişê meseleya kurdan pêard, şexsê Birêz Ocalanî de hêvîya demokrasî, haştîye û îradeyê cuyeyêka azade, ameyoxê azadî vejîya. Canêardişê heqê hêvî hem qerarê Mehkemeya Heqanê Merdiman a Ewropa binpay keno, hem zî wijdanî nîyo.”
‘Heto ke haştîye û demokrasî wazeno hazir o la dewlete game nêerzena’
Hemsereka DBP’yî derheqê qerarê Mehkemeya Heqanê Merdiman a Ewropa yê Demîrtaşî de zî vat: “No mojneno ke sîyaseto demokratîk binê zextî de yo. Xora dewaya Kobanê yena manaya redkerdişê heqê sîyasetê demokratîkî yê kurdan.”
Çîgdem Kiliçgun Uçare semedê meseleya Sûrîye zî wina vat: “Sûrîye ewro merkezo ke ameyoxê Rojheletê Mîyanênî do bewlî bikero. Tecrubeyê kurdan ê îdareyê demokratîkî yê ûca yî semedê merdimîye îmtîhano muhîm o. Prosesê çareserîye yê Tirkîya pabesteyê sîstemê demokratîkî yê Rojawanî yo.”
Çigdem Kiliçgun Uçare qiseykerdişê xo wina qedîna: “Heto ke haştîye û demokrasî wazeno hazir o. Dewlete game nêerzena û nozî prosesî fîneno zorî. La şarê kurdî û hezê demokratîkî bi hewayêkê qerardarî têkoşînê xo domnenê. Çunke hinî ganî miheqeq haştîye bibo.”
