Hemserekê KCD’yî Berdan Ozturk ke tewrê Newroza Erxenî bi, hêrişê vera dewa Berxbotanê ke eyn keye ra 7ê ci gedeyî 9 kesî ameyê kiştene, şermezar kerd û vat:”Berpirsîyar kam bo ganî hesab bido şaranê kurd, tirk û Rojhelatê Mîyanên.”
Qezaya Erxenî ya Amedê de vizêr Newroze bi programêk ameye pîrozkerdene. Sîyasetmedarê ke pîrozbayî de bîyê qisey kerd û vengdayîşê Rayberê Şarê Kurdî Abdullah Ocalanî ard vîr û waşt ke dewlete gaman bierza. Sîyasetmedaran hêrişê vera dewa Berxbotan ke 7ê ci gedeyî û ma û pîyê xo reyde 9 kesî ameyê kiştene, şermezar kerd. Hemserekê Kobgreya Komelo Demokratîk (KCD) Berdan Ozturk ke tewrê pîrozbayîya Newroze bi, derheqê hêrişê vera dewa Berxbotanî ya Kobanê ajansê ma rê qisey kerd.
‘Ganî berpirsîyarî hesabê nê qirkerdişî bidê’
Berdan Ozturk bale ant qirkerdişo ke dewleta tirke vizêr dewa Kobanê ya Berxbotanî de kerd û wina qisey kerd: “Dewêka Kobanê de 7ê ci gedeyî û ma û pî reyde 9 kesî qir kerdê. No sûcê merdimîye yo. Berpirsîyar kam bo ganî hesab bido şarê kurd, şarê Tirkîya û şarê Rojhelatê Mîyanênî. Nika Sûrîye de pêvînayîşî benê, averşîyayîş benê la dewleta tirke bi çeteyan wazena aramîya Vakûr û Rojhelatê Sûrîye orte ra wedarna. Ma na rewşe qebul nêkenê, ma şermezar kenê. Ma reyna vanê ganî hesabê nê bêro dayene.”
‘Ganî her kes goreyê manîfestoyî gaman bierzo’
Berdan Ozturk dewamê qiseykerdişê xo de dîyar kerd ke Rayberê Şarê Kurdî Abdullah Ocalanî bi manîfestoyê xo nîşan da ke hem seba Tirkîya hem zî seba Rojhelato Mîyanên ganî cuyêka senîne bêra awankerdene û vat: “No fersendêko pîl o. Ma vanê ganî her kes nê fersendî baş bierjno. Goreyê nê deklerasyonî, manîfestoyî ganî gaman bierzê. Nika dinya de zî nimûneyê xo est ê. Wexto ke wazenê probleman bi dîyalogî çareser bikerê, tay hêzî seba ke wazenê sabote bikerê provakasyonan kenê. Labelê ma reyna vanê ke ganî dewleta îqtîdarê AKP’yî ganî berpirsîyarê nê qirkerdişî eşkera bikero û bi ceza bikero. Ma nê qirkerdişî qebul nêkenê, ma şermezar kenê.”
‘Ganî Tirkîya Sûrîye ra vejîya’
Berdan Ozturk dîyar kerd ke dewleta tirke nêbeno ke Sûrîye de ba û wina vat: “Sûrîye dewletêka cîya ya, heqê ê însanan ke uca de ciwîyenê est o ke ameyoxê xo dîyar bikerê. Çend hêzê ke teberî ra ameyê Sûrîye, Tirkîya zî tede ganî bi lez Sûrîye terk bikerê. Na rewşe do vernîya provakasyonan zî bigîra. Lazim o Tirkîya uca ra vejîya, tu karê Tirkîya uca de çin o. Kurd, ereb, tirkmen, suryan, elewî û durzî wayîrê Sûrîye yê. Hêzê sey Tirkîya ke teberî ra ameyê nêwazenê Sûrîye de aştî biba, wazenê ameyoxê Sûrîye tarî bikerê. Nê semedî ra zî ganî Tirkîya uca ra vejîya.
