Hemserekê KCK’î Cemil Bayikî bale ante ser ke dewlete tirke mesele têna sey‚ Hareketere rê çekronayîş gena dest û va: “Eke şima binawanîya ke têkoşîno çekdar veto, werte ra wemedarê, PKK çeke caverdeno la siba yewna çeke geno.”
Hemserekê Konseya Rayberdişî ya KCK’yî Cemîl Bayik tewrê programê taybetî yê Stêrt TV’yî bi û mesajo bidîmen ê Rayberê Şarê Kurdî Abdullah Ocalanî, merasîmê çekveşnayîşî yê gerîlayan û averşîyayîşê peyênî yê Sûrîye erjnayî. Qiseykerdişê Bayikî ra qismêk wina yo:
”Rayber Apo têna semedê ma nê, semedê têgêrayîşê ma û şarê kurdî nê, semedê merdimîyê rolo tarîxî kay keno. Coka vengdayîşê ci tarîxî yo. Rayber Apo bi berpirsîyarîye têgêreno. Dîmenanê ci pêro embazan ser tesîr kerd la eslê xo de semedê şarî, merdimîye tesîrê gird kerd. Rayber Apoyî çi vat bi? ‘Pawitişê mi ça de yê ez ûca de ya’ No heqîqetê Rayber Apoyî yo, heqîqetê ma yo. Semedê ma dîmenan ra zafêr felsefe, fîkr, sîstemo ke aver berdî muhîm ê. Ma çend ey raşt fam bikerê ma hende yewbînan rê benê nizdî.
Heta ke meseleya kurdan zemînê şerî ra nêro vetene têkoşîn netîce nêgeno û xeylî hetî serê şerê Kurdîstanî ra rant fînenê dest. Rayber Apoyî semedê xelisnayîşê nê şarî têkoşîn kerd û ser kewt. Înkarê kurdan werte ra wedarit. Kurdî hinî bêhêvî nêbenê. Rayber Apo şarê kurdî newera kerd ganî û îspat kerd ke hinî çew nêeşkeno kurdan werte ra wedaro. Vengdayîşê ci yo peyên na çarçewe de yo. Tecrîdê serê Rayber Apoyî çend mengî yo biney bîyo nerm la tecrîd werte ra nêdarîyo we.
Rayber Apo binê tecrîdî de xebatanê xo domneno. Her kes nê vîneno. Rayber Apoyî bado ke hemleya yewhete kerde çîyo ke kewno milê ci ard ca. Têgêrayîşê ma zî wezîfeyê xo ard ca. Hinî gerek şertê Rayber Apoyî bêrê bedilnayene. Gerek cayê ci bêro bedilnayene. Gerek hinî bieşko bi şarî, têgêrayîşî, roşnvîr, sîyasetmedar û akademîsyen rede pêvînayîşan bikero. Gerek hinî qedexeyî bêrê wedaritene. Kam ke wazeno Rayber Apoyî bivîno, tede roportaj bikero gerek bieşko şiro Îmrali. Sîstemê Îmraliyî sîstemê tecrîdî yo. Gerek no sîstem werte bêro wedaritene.
Badê vengdayîşê Rayber Apoyî merasîmêk ame kerdene. Çunke semedê ma Rayber Apo esas o. Têna eke Rayber Apo veng bido gerîla, têgêrayîş û endamê têgêrayîşî eşkenê nê bikerî. Teberê Rayber Apoyî qala ê bînan nîna goştarîkerdene. Gerek her kes nê bizano. Çunke kam tewrê têgêrayîşî beno tewrê Rayber Apoyî beno. Kam ke ewro têgêrayîş de xebityeno sûnd wendo. Çeke ke girewto bi waştişanê Rayber Apoyî girewto. Na çarçewe de têkoşîn keno. Coka bê Rayber Apoyî çew nêeşekno înan ra çeke bîgiro.
Eke Rayber Apo bieşko azad bixebito, qanûnê azadîye bêrê averberdene, qanûnê entegreyê dmeokratîkî bêrê averberdene û zemîn yeno afrinayene û ma zî eşkenê çekan ronê. Eke wina mebo çew nêeşkeno mara vajê çeke ronê. Mesele têna çekronayîş nîyo. Kurdan waştêne bi îrade, nasname û erjanê xo biciwîyê. Nê îmkanî çînbî. Coka têkoşînê çekdarî dest pê kerd. Eke şima binawanîya ke têkoşîno çekdar veto, werte ra wemedarê, PKK çeke caverdeno la siba yewna çeke geno. PKKyî keyfî ra çeke nêgirewt. Dewleta tirke bi sîyaset û kerdişanê xo nê rê mecbur verda. Eke têgêrayîşê çekdarî nêwezenê wa sîyasetê xo bibedilnê. O wext çareserî bena. Têna bi meseleya çeke mesele çareser nêbena. Heta nika înan zîhnîyetê înan de bedilnayîş nêbîyo. Coka qanûnan nêbedilnenê. Heta ke komîsyon înan mebidilno, meseleya kurdan esas mekero, qanûnanê azadîye û entegreyî aver mebero mesele çareser nêbena. Coka gerek xebetanê winayênan bikero.”
