Aktîvîsta TJA’yî Çaglar Demîrel ke beşdarê “Rayîrşîyayîşê Çareserîya Demokratîke û Azadîye” bîye wina vat: “Armancê rayîrşîyayîşê ma azadîya Birêz Ocalanî, peynîkerdişê hêrişê hemverê Rojawanî û ameyîşê demokrasî yê welatî bî.”
Çarçewaya kampanyaya, “Abdullah Ocalanî rê azadî, meseleya Kurdî rê çareserîya sîyasî” bi serkêşîya Platformê Sazgehê Demokratîk (DEKUP) rayîrşîyayîşêk ame organîzekerdiş. Waştişê semedê wedaritişê tecrîdê Rayberê PKK’î Abdullah Ocalanî ser o, awankerdişê bingehê sîyasetê demokratîk û vindarnayîşê hêrişê Bakûr û Rojhelatê Sûrîye ser o vejîyayî vernî. Bi nê armancî “Rayîrşîyayîşê Çareserîya Demokratîke û Azadîye” ke 16ê kanûne de Amed de dest pêkerd, Riha, Dîlok, Edene û Mêrsîn de dewam kerd. Rayîrşîyayîş Enqere de peynî bî.
Aktîvîsta Têgêrayîşê Cinîyanê Azadan (TJA) Çaglar Demîrel ke beşdarê Rayîrşîyayîşê Azadiyî bîye, Jinnewsî rê ercnayîş kerd.
‘Armancê ma zaf zelal o’
Çaglar Demîrel da zanayîş ke armancê rayîrşîyayîşî zaf zelal o û vat: “Ma waşt waştişê azadîye biresnê her kesî. Ma waşt hem semedê Kurdan, hem zî semedê Tirkîya nê bikerê. Eke welatêk de azadî û demokrasî pê nêro, rast nîyo ne merdim cuyêke azad nê welatî de biwazo. Ma vînenê ke Tirkîya de azadî û demokrasî çin a. Temamê rayîrşîyayîşî de ma rastê hîn astengîyan ameyî. La ma semedê azadî û demokrasî destûrê kesî ra nêwazenê. Xora hukmatê nê welatî wina yo. Ma bi waştişêk winasî vejîyayî rayîr, semedo ke ewro no bica nêame.”
‘Hukmat game nêerzeno’
Çaglar Demîrel, dîyar kerd Tirkîya de derheqê meseleya Kurdî de prosesêk est o û vat: “Birêz Ocalanî ser o tecrîd est o. Omer Ocalan keso peyîn bi ke Birêz Ocalanî dir pêvînayîş kerd. Birêz Ocalanî vat, ‘tecrîd dewam keno’. Labelê ti gamî nînê eştiş. Ganî Birêz Ocalan bêro vînayîş û azadîya fîzîkî bêro dayîş. Demokrasî, çareserî û azadî tena bi azadîya fîzîkî ya Birêz Abdullah Ocalanî mumkin a. No waştişê pêro şaran o.”
‘Hemverê Rojawanî de hêrişêk pîl est o’
Çaglar Demîrel, dewam de vat: “Şarê Kurdî bi serran o polîtîkayê înkar, îmha û asîmîlasyonî dir rî bi rî yo. Rayîro tewr baş qetî kerdişê demokrasî û têkoşîna hemverê modernîteyê kapîtalîstî yo. Ma armanc kenê ke azadîya cinî û ekolojî bipawê û na çerçewa de têkolîn bikerê. Ewro Rojawanî ser o hêrişêk pîl est o. Cayê ke rêxistinê cîhadî serdest ê, ma nêeşkenê qalê azadîya cinî bikerê. Nimûneyê ci ma Afganîstan û Îran de vîna. Ma vînenê ke xoverdayîşê Sûrîye, xoverdayîşê cinî yo. Semedo ke şexsê cinîyanê Rojawanî de xoverdayîşêk pîl beno.”
‘Ganî statuyê Rojawanî bêro naskerdiş’
Çaglar Demîrel wina qedêna: “Şarê Rojawanî binê tehdîdî de yo. Rojawan de têkoşînêk mîyanneteweyî est o. Wazenê Rojawanî mîyanê Sûrîye de bifetisinê û bihelênê. Ganî statuyê Rojawanî bêro naskerdiş. Armancê nê rayîrşîyayîşî paştdayîşê Rojawanî bî. Ganî pêro dinya bi xususî zî Tirkîya Rojawan bipawa. Ma hewl da bi rayîrşîyayîş nê çî bimojnê.”
