Komîteya Wezaretan a Konseya Ewropayî çarçiweya qerarê xo yê 17ê Êlule de Tirkîya ra vengê “Bi lezûbez gamê hewceyî” bierze da û hetanî Hezîrana 2026î zî waştişê agahî kerd.
Komîteya Wezaretan a Konseya Ewropayî çarçiweya qerarê xo yê 17ê Êlule de ‘Heqê Hêvîye’ qebul kerd. Komîteya Wezaretan a Konseya Ewropayî, Tirkîya ra vengê “Bi lezûbez gamê hewceyî” bierze da û hetanî Hezîrana 2026î zî waştişê agahî kerd.
Komîte, 15-17 Êlule mîyan de ke Ciwîyayîşê Heqanê Merdiman ra dima qerarê xo eşkera kerd va ke seba ke qerarê dosyaya ‘Grûba Gurbanî’ bi lez bêrê caardene, çarçewaya planê fealîyetî yê neweyî de ke mekanîzmaya cigêrayîşî seba cezaya muebbedî ana, ganî vurîyayîşê qanûnî bêrê kerdene. Komîte da zanayene ke Tirkîya bi naye sînor nêmano, Komîsyonê Paştîdayîşê Mîllî, WayûBirayî û Demokrasî yo ke Meclîs de ameyo ronayene, şêno seba ke serrastkerdişê qanûnîyê lazimî biyaro ca, bêro şuxulnayene. Qerare de, teklîfê qanûnî yê ke verê cû hetê Meclîsî ra ameybî pêşkêşkerdene, hetê parlamentoyî ra bêrê qebulkerdene zî ca girewt.
Qerarê Komîte de ame vatene ke goreyê huqûqê mîyanneteweyî ganî mekanîzmayê ke dima ke ceza muebbedî dîyaye, tewr pey 25 serrî ra dima firsendê cigêrayîşî danê, estbibê.
Qerarê Komîte de ame eşkerakerdene ke seba ke Tirkîya tedbîrê besî û tedbîrê qanûnîyê lazimî nêgirewtê, xemgînîye dîyaye. Komîte, wayîranê selahîyetî ra waşt ke bê ke zêde erey nêkerê, tedbîranê laziman bigêrê.
Qerarê Komîte wina yê:
Wayîranê selahîyetî teşwîq kerdê ke seba ke qerarê grûba mewcûde bi lez bêrê caardene, mabênê alternatîfanê cîyayan de ke destê înan de yê, cigêrayîş bikerê; nê alternatîfan ra yew zî çarçewaya Planê Fealîyetî yê Heqanê Merdiman ê neweyî de ke mekanîzmaya cigêrayîşî seba cezayanê muebbedî ana, vurîyayîşê qanûnî bêrê kerdene; şuxulnayîşê teşebusê ‘Tirkîyaya bêteror’ û “Komîsyonê Paştîdayîşê Mîllî, Wayûbirayî û Demokrasî” yo ke newe ronîyayo û selahîyetê ey est o ke Meclîsî rê vurîyayîşê qanûnî teklîf bikero; ya zî teklîfê qanûnî yê ke verê cû hetê endamanê Parlamentoyî ra ameybî pêşkêşkerdene, hetê Parlamentoyî ra bêrê qebulkerdene.
Reyna înan teşwîq kerdê ke dewletanê bînan ê endaman ra ke mekanîzmayê winayîn ardê ca, îlham bigêrê. Wayîranê selahîyetî dawet kerdê ke seba ke caardişê grûba dewaya mewcûde de bi lez rayîr bêro girewtene, heta peynîya Hezîrana 2026î derheqê tedbîranê ke ameyê girewtene de malumat bidê.
