Di encamnameya Komxebata Sînameya Kurdî de hat diyarkirin ku Înîsiyatîfa Sînemagerên Kurd hatî damezirandin û ev tişt hat destnîşankirin: “Ji bo domdarî û xurtkirina kar û xebatên sînemayê rêxistineka xurt a ku wekhevîya zayendî, ji hêla bi rêvebirin û biryardayînê demokratîkbûnê diparêze pêwîst e.” Her wiha di encamnameyê de hat gotin ku Înîsiyatîfa Sînemagerên Kurd hatiye damezirandin
Encamnameya Komxebata Sînemaya Kurdî ya ku di 4 û 5ê Tîrmehê de li Amedê hatibû lidarxistin, hat aşkerakirin. Di daxuyaniya encamnameyê de hat diyarkirin ku Înîsiyatîfa Sînemagerên Kurd hatiye damezrandin.
Encamnameya Komxebata Sînemaya Kurdî wiha ye:
“Komxebata Sînemaya Kurdî bi mebesta dahûrîna rewşa sînemaya Kurdî di 4 û 5ê Tîrmeha 2026an de hat lidarxistin. Şert û mercên sînemaya Kurdî ji gelek aliyan ve hate nirxandin. Pirsgrêkên heyî bi berfirehî hatin niqaşkirin. Komxebat du rojan, bi niqaşên pirsgrêkên hevpar û bi pêşnîyarên çareseriya pirsgirêkan berdewam kir.
Bi rêya nîqaşên ku di komxebatê de hatin kirin, hat destnîşankirin ku sînemaya Kurdî bi tenê wek bi çêkirina filman sînordar nîn e. Sînemaya Kurdî, qadeka pir alî ye ku divê li gel ziman, bîr, estetîk, sazîbûn, perwerdehî, piştgirî dîtin, hilberîn, belavkarî, wekheviya zayenda civakî û rêgezên etîk bê nirxandin. Bi niqaşên beşdaran derket holê ku sînemaya Kurd xwedî potansîyeleke xurt a afirîneriyê ye. Lêbelê, nebûna rêxistina hevpar, qûtbûna têkiliya nav sînemageran, têrnebûna mekanîzmayên hilberîna domdar, derfetên perwerdehiyê yên sînordar, pirsgirêkên fînansmanê, torên belavkirinê yên lawaz û nebûna arşîveke hevpar û binesaziya ragihandinê wekî sedemên sereke yên ku pêşketina vê potansiyelê asteng dikin hatin destnîşankirin. Xebatên pir girîng ên wek çêkirina filman, festîval, akademî, hilberînên kolektîf û takekesî pêk hatine. Lê tu carî bi awayekî domdar, mekanîzmayên bi rêk û pêk ên hilberînê, piştevaniyê bi pêş neketine. Ji ber vê yekê, niqaşên komxebatê wek pirsgrêka sereke nebûna hevgirtin û sazîbûnê hate diyarkirin û wek pêdiviya herî lezgîn bi hev girtin, xwe bi rêxistinakirina sînemagerên kurd hate destnîşankirin. Bi şêweyeka kolektîf, demokratîk xwe bi rêxistinkirin wek xaleka sereke a komxebatê hate diyarkirin.
Mijarên sereke yên ku di komxebatê de hatin destnîşankirin ev in:
*Pênase, ziman, çarçove û rewşa estetîk a sînemaya Kurdî
*Pêdiviya bi sazîbûn û pêkhateya kolektîf
*Pêvajoyên hilberîn, fînansekirin û fîlmçêkirinê
*Derfetên perwerdehî û pêşketina pîşeyî
*Belavkirin, nîşandan û tevlîbûna temaşevanan
*Komîsyonên arşîvkirin û avakirina bîra sînemaya Kurdî
*Teknolojiyên dîjîtal û amûrên nû yên hilberînê
*Wekheviya zayendî û rêgezên etîkî
Piştî nîqaşan, lihevkirinek çêbû ku pêşeroja sînemaya Kurdî bi hewldanên takekesî heta derekê diçe lê ji bo domdarî û xurtkirina kar û xebatên sînemayê rêxistineka xurt a ku wekheviya zayendî, ji hêla bi rêvebirin û biryardayînê demokratîkbûnê diparêze pêwîst e. Li gorî vê yekê, biryara ku komîsyonên ji bo bi rêvebirina karên wek perwerdehî, dîtina fonan, belavkirin, arşîvkirin, mafê telîfê, polîtîkayên etîkî û teknolojiyên nû de werin avakirin hat dayîn.
Înîsiyatîfa Sînemagerên Kurd hat damezirandin
Wekî encama herî girîng a komxebatê, Înîsiyatîfa Sînemagerên Kurd hate damezrandin da ku li vê qadê koordînasyonê saz bike, xebatên xwe bi rêxistina komîsyonan bimeşîne.
Lijneya bi rêvebirina înîsiyatîfê bi dengdana hevpar a beşdaran hate diyarkirin. Ev lijneya hate diyarkirin wê dest bi xebatên şêweya sazûmaniya sînemaya kurdî bike.
Armancên sereke yên Înîsiyatîfa Sînemagerên Kurd ev in: xurtkirina bîra kolektîf a sînemaya Kurdî; piştgirîkirina pêvajoyên hilberînê; pêşxistina hevkariyên neteweyî û navneteweyî; birêxistina karên perwedehîyê; pêşxistina projeyan; di hilberînê de bicihkirina hişmendiya wekheviya zayendî, xwezaparêz û bi hev re avakirina pêşeroja sazûmanî ya sînemaya Kurdî.
Ev encamname, bi nirxandin û biryardayîna hevpar a beşdarên komxebatê derketiye holê û bi raya giştî re tê parvekirin.”
