Serdana ji bo bîranîna cangoriyan Tevgera Azadiyê yên Kurdistanê bi tevlibûnên nûnerên saziyan û hezaran kesan, bi berzkirina dirûşma ‘Şehîd Namirin’ didome.
Bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) a Amedê ji bo cangoriyên Tevgera Azadiyê ya Kurdistanê ên di dem û dîrokên cuda de jiyana xwe ji dest dane, li Parka Koşuyoluyê ya Amedê ji bo sê rojan konê şînê ango konê bîranînê hatiye danîn. Serdanên ji bo şînê bênavber bi girseyî didomin.
Ji bo cangoriyan di roja dawî de mewlîd hate xwendin û bi hezaran kes, rêveber û nûnerên saziyên sivîl, partiyên siyasî, rûspî, seyda û kesayet bi girseyî serdana bîranînê dikin û sersaxiyê ji gelê Kurdistanê re dixwazin. Her wiha bi sedan kes ji bajarên derdora Amedê jî bi girseyî tên serdana bîranînê û dibin hevxemê êşa malbatan.
Di serdanê de girse bênavber dirûşmeya “Şehîd Namirin” berz dike û hestên xwe bi malbatan parve dikin û peyama xurtkirina têkoşînê û xwedîderketina li cangoriyan didin.
