Hevserokê DEM Partiyê yê Giştî Tûncer Bakirhan ku li Amedê derbarê qeyiman de axivî wiha got: “Di vê pêvajoya nû ku em ketinê de ji bo ku ev pêvajo baş bimeşe divê êdî pêkanînên qeyiman bên bidawîkirin. Mirov êdî li benda gavên şênber in.”
Li Amedê bi tevlibûna Hevserokê Partiya Wekhevî û Demokrasiyê ya Gelan (DEM Partî) ê Giştî Tûncer Bakirhan bi dirûşma “Em xwedî li vîna xwe derdikevin û li dijî pêkanînên qeyiman dengê xwe bilind dikin” li ber deriyê avahiya Şaredariya Bajarê Mezin a Amedê daxuyanî hate dayîn. Rêveber û Hevşaredarên DEM Partiyê yên hemû bajêr û navçeyan tev li daxuyaniyê bûn. Hevşaredarên ku qeyim tayînî şûna wan hatine kirin jî tev li daxuyaniyê bûn.
‘Qeyim ji bo vî welatî cihê şermê ne’
Bakirhan da zanîn ku ji sala 1999an ve tecrubeya wan a şaredariyan heye û behsa xebat û projeyên xwe kir. Bakirhan bal kişand ser civîna partiya xwe ya bi hevşaredaran re û wiha got: “Em têkildarî qeyim axivîn. Şaredariyên me bi awayekî nelirê tên bi rê ve birin. Ez behsa şaredariyên ku qeyim bi rê ve dibin nakim. Çapemeniyê şahidiniya gelek tiştan kir. Êdî ev qeyim ji bo vî welatî cihê şermê ne. Divê ev şerm ji holê bê rakirin. Divê ev xespa vînê bi dawî bibe.”
‘Di pêvajoyeke ku qeyim nebin de em ê ji gelê xwe re xizmetên baştir bikin’
Tûncer Bakirhan destnîşan kir ku divê di pêvajoya “Aştî û Civaka Demokratîk” de şaredarî radestî nûnerên gel ên rast bê kirin. Bakirhan navê hevşaredarên ku qeyim tayînî şûna wan hatine kirin yek bi yek got û anî ziman ku divê 13 hevşaredar vegerin ser karê xwe. Di vê mijarê de hewcehî bi qanûnan jî nîne. Dikarin di vê pêvajoyê de bikin ku dîsa hevşareadr vegerin ser kare xwe. Heke em weke xwişk û bira bijîn û êdî dem dema siyaseta demokratîk be divê cihekariya ku li şaredariyên me hatiye kirin ji holê bê rakirin ji bo şaredariyên me projeyên xwe pêk bînin tevkarî bê kirin. Kêmasiyek hebe em dikarin ji holê rabikin, em ê xizmetên baş bi hev re pêk bînin. Ev pêvajo di heman demê de pêvajoyeke ku pêşiyê li rêveberiyên herêmî jî veke ye. Di pêvajoyeke ku lêpirsîn, binçavkirin, girtin û qeyim nebin de em ê ji gele xwe re xizmetên baştir bikin.”
‘Mirov êdî li benda gavên şênber in’
Bakirhan piştî axaftinê pirsên rojnamegeran bersivandin û wiha got: “Di vê pêvajoya nû ku em ketinê de ji bo ku ev pêvajo baş bimeşe divê êdî pêkanînên qeyiman bên bidawîkirin. Mirov êdî li benda gavên şênber in. Bidawîkirina pêkanîna qeyiman dikare bibe gava ewil a pêvajoya nû. Gelê me êdî li benda pratîkan e. Gave herî girîng û pratîk ew e ku peywîra Ehmed û li gel wî 13 hevşaredarên me radestî wan bê kirin.”
Daxuyanî bi çepikan bi dawî bû.
