Şirnex – Dayikên Aştiyê yên Botanê tekildarî hevdîtinên şanda DEM Partiyê ya bi partiyên siyasî re nirxandin kirin û anîn ziman ku ji bo çareserî pêk bê divê deriyê Îmraliyê bê vekirin. Dayikan xwest ji bo aştiyek demokratîk tecrîd bi dawî bibe û êrişên li ser Rojava rawestin.
Şandeya Îmraliyê ku ji parlamenterên DEM Partiyê Pervîn Bûldan û Sirri Sureyya Onder pêk tên, di 28ê kanûnê de çûn Girava Îmraliyê û bi Rêberê PKKê Abdullah Ocalan re hevdîtin kirin. Şandeyê piştî hevdîtinê di 29ê kanûnê de fikir û nêrînên Abdullah Ocalan bi daxuyaniyeke nivîskî bi raya giştî re parve kirin. Abdullah Ocalan di peyama xwe de li ser 7 xalan rawestiya û destnîşan kir ku ew ji bo çareseriyê ji gav avetinê re amade ye. Piştî hevdîtinên li Îmraliyê şandeya DEM Partî, bi partiyên siyasî re hevîtin kirin. Li Kurdistan û Tirkiyeyê piştî hevdîtinên li Îmraliyê ji aliyekî ve nîqaşên “Çareseriye” di rojevê de ne, ji aliyê din ve ji polîtikayên dewletê yên tecrîd, qayûm û êrişên li ser Bakur û Rojhilatê Suriyeyê berdewam dikin. Dayikên Aştiyê yên Botanê ku bi salan e ji bo aştiyê têdikoşin jî tekildarî pêvajo û hevdîtinan diyar kirin ku aştî bi polîtikayên desthilatiyê ne pêkan e û got: Ji bo aştî pêk were divê di serî de tecrîda li ser Abdullah Ocalan bê rakirin û êrişên li ser Bakur û Rojhilatê Suriyeyê bi dawî bibin.
‘Ji bo aştî û çareseriyê divê şer bi dawî bibe’
Ji dayikên aştiyê Ayşe Hezer anî ziman ku daxwaza wan pêkhatina aştiyeyê û ev tişt gotin: “Ji aliyekî ve hevdîtin pêk tên. Lê ji aliyê din vê jî êrişên wan ên li ser Rojava neqedya ne. Her wiha girtin, binçavkirin û tayinkirina qeyûman li ser şeredariyan jî berdewam dike. Ji aliyê din vê jî tecrîda li ser Birêz Abdullah Ocalan jî berdewam dike. Ji bo aştî û çareseriyek pêk were divê ew şer bi dawî bibe. Divê tecrîda li ser Serokê me rabe û ew ji girtîgehê derkeve. Lê mixabin tu gav neavetine. Em naxwazin Tirkiye bi balafîrên xwe Rojava bombebaran bike. Em kuştinê naxwazin. Bila ne ew bimirin ne jî em. Bila aştî û wekhevî pêk were. Bila deriyê girtîgehan vebe. Girtiyên siyasî bên berdan. Nasname û mafên me bên naskirin. Bi wî awayî aştî pêk tê û çareserî dibe.”
‘Bi tecrîdê aştî pêk nayê’
Ji dayikên aştiyê Kiymet Acar jî destnîşan kir ku ew di pêvajoya hevdîtinê de rêyedarên dewletê samîmî nabîninê û got: “Bila gavên xapînok neavejin. Heke dest dirêj dikin bila ji dil bikin. Em jî weke dayikên aştiyê dixwazin aştî pêk were û şer bi dawî bibe. Hem qala aştiyê bikin û hem jî êrişî Rojava bikin çareserî pêk nayê. Heke tecrîd berdewam bike aştî pêk nayê. Heta tecrîd nayê rakirin û Serokê me bi awayekî azadiya fizîkî li ser masayê rûnenê çareserî pêk nayê. Divê deriyên zindanan jî vekin. Heke ji dil bin divê van gavan bavejin. Edî bes e bila ew xwîn bisekine. Bila aştî û wekhevî were vî welatî. Tenê daxwaza me ew e.”
