Tifaqa Jinan a Navneteweyî (IWA) ya li Ewropayê bi daxuyaniyekê bang li tevaniya jinên cîhanê kir ku şoreşa jinê ya li Rojava biparêzin.
Tifaqa Jinan ya Navneteweyî (International Women’s Alliance – IWA), destnîşan kir ku armanca êrîşên ku di 6ê Çileyê de dest pê kirine, demokrasiya bingehîn e û hat gotin ku armanca van êrîşan ji holê rakirina azadiya jinan, ferzkirina rejîmeke navendî, baviksalarî ye. Di daxuyaniyê de, hat gotin ku êriş ji aliyê hêzên Colanî ve, bi piştgiriya Tirkiyeyê hatine kirin û hat destnîşankirin ku ev êriş bêyî erêkirina hêzên navneteweyî yên wekî Dewletên Yekbûyî yên Amerîkayê (DYE), Ingilîstan, Îsraîl û Tirkiyeyê ne pêkan bû. IWAyê, her wiha da zanîn ku berpirsiyariya sermayeya navneteweyî, şîrketên xaza xwezayî û petrolê, bazirganên çekan û aktorên aborî di van êrîşan de hene.
‘Parastina Rojava siberoja jinan e’
IWAyê, diyar ku hedefa sereke ya vî şerî jin in û ev tişt hate gotin: “Şervanên jin hatin înfazkirin û cenazeyên wan hatin texrîbkirin. Jinên ku hatin dîlgirtin hatin qetilkirin, winda bûn û wekî xenîmet hatin nîşandan. Keziyên hatine birîn wekî sembola serdestiyê di merasîman de hatin nîşandan. Peykerên jinên berxwedêr hatin xistin. Ev kiryarên terorîstî ne ku armanca wê ji holê rakirina bîr û siberoja azadiya jinan e.”
‘Jinên Rojava ne qurbanî ne ew şoreşger in’
IWAyê, ji bo parastina şoreşa jinan banga seferberiya li seranserê jinên cîhanê, rêxistinên femînîst, sendîkayan, rêxistinên şoreşgerî û hemû hêzên li dijî emperyalîzmê têdikoşin kir. IWAyê destnîşan kir ku divê her kes li dijî rewabûn, fînansekirin û hevkariya bi hemû hêzên ku êrîşî Rojava dikin derkevin û ev tişt hat gotin: “Piştgirî bidin jinên ku li qadê li ber xwe didin. Ew ne qurbanî ne. Berevajî, ew şoreşger in!”
