Endamê Konseya Îdareyî ya KCK’yî Mustafa Karasuyî bale ante ke hêrişê vera Rojava prosesî sabote kenê û na rewşe sey komployê mîyanneteweyî ya.
Karasuyî dîyar kerd ke hêrişê vera Rojava prosesê “Haştîye û Komelê Demokratîkî” ke Tirkîya de yeno averberdene bi qestî sabote kenê. Karasuyî vat ke çend ke feshê PKK’yî, vindarnayîşê têkoşînê çekdarî û vengdayîşê haştîye est bibo zî, dewleta tirke gama şênbere nêeşte, komîsyono ke Meclîsî de awan bîyo zî zaf hêdî hareket keno. Dewamê tecrîdê Îmrali û prosesî de vernîgirewtişê beşdarbîyayîşê Abdullah Ocalanî sey sebebê bingeyin ê xetimîyayîşî yenê meydan.
Karasuyî dîyar kerd ke hêrişê Şêxmeqsûd û badê zî Rojavaya Kurdîstanî tena operasyonêko eskerî nîyê, parçeyê komployê mîyanneteweyîye yê. Karasuyî da zanayene ke bi qebûlkerdişê hêzanê sey Amerîka, Fransa û Îsraîlî îdareyê Şamî û Tirkîya rê desturê hêrişê Rojava ame dayene. Amancê nê hêrişan tena Rojava nîyo, heme destkewteyanê kurdan û vernîgirewtişê statuyê kurdan o.
Karasuyî îfade kerd ke şorişo ke Rojava de yeno kerdene bingeyê îradeyê cinîyan ser o şekil gêno û coka beno hedefê cîhadîstan. Coka nê hêrişî hetêk ra zî rasterast îradeyê cinîyan ser o yenê kerdene.
Karasuyî bale ante ke xoverdayîşê Rojava bingeyê şarî ser o yo, bi taybetî rolê cinîyan vernî de yo û Rojava sey “şorişê cinîyan” dîyar kerd. Karasuyî îfade kerd ke hêrişî eynî wext de vera têkoşînê azadîya cinîyan û modelê demokratîk ê zî.
Peynî de Karasu, her çar parçeyan de wirzîyayîşê şarê kurdî yê payan ser o sey qewmîyayîşêko pozîtîf nirxna û venga yewbîyayîşê hêzanê sîyasî yê kurdan da û bale ante ke kurdî ganî hêzanê teberî ney hêzê xo yê zereyî bivînê û tira bawer bikerê.
