Bijîşkên dildar ên Silêmaniyê bang li hikûmeta Herêma Federe ya Kurdistanê kirin ku ji bo ew karibin welatiyên ji Rojavayê Kurdistanê derman bikin xwestin li ser sînorê Sêmalka navend an jî koneke tenduristiyê bê vekirin.
Di çarçoveya piştgiriya ji bo berxwedana Rojavayê Kurdistanê de, Bijîşkên Xwebexş ên Silêmaniyê li ber Baxê Giştî yê bajarê Silêmaniyê çalakî lidarxistin û daxuyanî dan çapemeniyê. Di daxuyaniyê de Dr. Rewa Ebdulrehman li ser navê bijîşkan peyamek da.
Dr. Rewa Ebdulrehman diyar kir ew ji demek dîrokî derbaz dibin û diyar kir ku ger ew bêdeng bimînin û van derfetan ava nekin dê dîrok bi ti awayî Kurdan efû nake.
‘Em ê xizmeta mirovahiyê bikin’
Dr. Rewa Ebdulrehman bal kişand ser berpirsyariya mirovî û têkildarî mijarê ev tişt gotin: “Me wek bijîşk sond xwariye ku xizmeta mirovahiyê bikin. Ger xizmet ji bo gelê me pêwîst be, çi dikeve ser milê me, em ji bo xwe erk dibînin. Em ê di warê tenduristiyê de piştevaniya Rojavayê Kurdistanê bikin. Em bang li Hikûmeta Herêma Federe ya Kurdistanê û aliyên peywendîdar dikin ku di dabînkirina pêwîstiyên tenduristiyê ya ji bo Rojavayê Kurdistanê alîkariya me bikin.”
‘Ji me re koneke tenduristiyê vekin’
Di dawiya axaftina xwe de Dr. Rewa Ebdulrehman ji hikûmeta Herêma Federe ya Kurdistanê xwest ku ji bo ew karibin welatiyên birîndar ên Rojavayê Kurdistanê derman bikin, navendek tenduristiyê yan jî koneke tendurisiyê li ser sînorê Sêmalka were avakirin.
