Xizmên Windayan û rêveberên ÎHDa Amedê di hefteya 885emîn de di dorpêça polîsan de li aqubeta Serdar Taniş û Ebûbekîr Denîz pirsîn.
Xizmên Windayan û Rêveberê Şaxa Komeleya Mafê Mirovan (ÎHD) a Amedê ji bo winda bên dîtin û kujer bên darizandin li pêşberî Bîrdariya Mafên Jiyanê ya Parka Koşuyolu ya Amedê di hefteya 885emîn de çalakiya xwe ya heftane berdewam kirin.
Xizmên Windayan, endam û rêveberên ÎHDê, rêveberên DEM Partiyê û nûnerên rêxistinên sivîl tev li çalakiyê bûn û wêneyên windayan hildan.
Polîsan bi hinceta biryara “qedexekirina çalakî, meş û daxuyanî” ya ku ji aliyê Walîtiya Amedê ve hatiye girtin, kirin hincet û hewl dan çalakî neyê kirin. Lê tevî vê yekê jî çalakî di dorpêça polîsan de hate lidarxistin.
Xizmên Windayan û ÎHDê vê hefteyê li aqûbeta Serokê HADEPa Silopiya Serdar Taniş û rêveberê HADEPa Silopiya Ebûbekîr Denîz ku 25ê Çileya 2021an de hatibûn windakirin, pirsîn û xwestin kujer werin darizandin.
‘Li Rojava yê mafê mirovan tê binpêkirin’
Sekreterê ÎHDa Amedê Firat Akdenîz pêşî axivî û bertek nîşanî astengiya polîsan da û anî ziman ku êrişên li ser Rojava li dijî mirovahiyê ne. Akdenîz da zanîn ku bi wan êrişa mafên mirovan tên binpêkirin û got: “Yên ku duh behsa biratiya hezar salan dikirin, îro ji zilma ku li ser Kurdan tê kirin, li çepikan didin. Em wan êrişan şermezar dikin.”
Aqûbeta Denîz û Taniş hê jî ne diyar e
Rêvebera ÎHDa Amedê Berfîn Elçî jî metna daxuyaniyê xwend û bal kişand ser windakirina Serdar Taniş û Ebûbekîr Denîz û wiha got: “Serdar Taniş ê 25 salî û hevalên xwe li Silopiyê dest bi xebatên vekirina rêxistina HADEPê dikirin. Fermandarê Leşkeriya Şirnexê Levent Ersoz gef li her du siyasetmedaran xwar û zextên giran li gelê Silopiya dikir. Tevî hemû zext û zordariyan jî di 3yê Çileya 2001ê de rêxistina HADEPê hate vekirin û Serdar Taniş bû Serokê rêxistina navçeyê. Di 25ê Çileya 2001ê de Fermendariya Cendirmeyan a Silopiyê li Serdar Taniş digere û jê dixwazin ku biçe Fermandariya Cendirmeyan. Serdar Taniş, bi rêveberê navçeyê Ebûbekîr Denîz re diçe Fermandariya Cendirmeyan a Silopiyê û pişt re ji wan tu agahî nayê girtin. Li ser vê yekê malbatan serî li Dadgeha Mafên Mirovan a Ewropayê (DMME) didin. DMMEyê derbarê kuştina Serdar Taniş û Ebûbekîr Denîz de biryar da ku dewleta Tirk berpirsiyar e.”
Piştî daxuyanî hate xwendin ji bo bîranîna Taniş û Denîz û hemû windayan di dorpêça polîsan de deqeyek çalakiya rûniştinê li dar xist.
