Li navçeya Erdîşê êrişên li ser Rojavayê Kurdîstanê bi meş û daxuyaniyeke girseyî hat şermezarkirin û ev tişt hatin gotin: “We bav û kalên me jî qetil kirin û em îro li ser axa wan bangî we dikin; destên xwe yên qirêj nedin Rojava.”
Li navçeya Erdîşê a Wanê, bi pêşengiya Partiya Wekhevî û Demokrasiyê ya Gelan (DEM Partî) li dijî êrişên li ser rojavayê Kurdistanê meş hat lidarxistin û daxuyanî hat dayîn. Bi hezaran kes beşdarî çalakiyê bûn û dirûşmeyên “Bijî berxwedana Rojava”, “Kobanê dê ji bo DAIŞê bibe goristan” û “Bijî Rêber Apo” berz kirin û pankartên bi nivîsên “Rojava dê ji bo DAIŞê bibe goristan” û “Rojava xeta me ya sor e” û “Jin, jiyan, azadî” hatin berzkirin. Parlementer, siyasetmedar, endam û rêbeberên partiyên siyasî, nûnerên saziyên sivîl ên demokratîk û bi hezaran welatî tev li çalakiyê bûn.
‘Kobanê tu car nakeve’
Di daxuyaniyê de ewilî Dayika Aştiyê Saîde Ûlûgana axivî û diyar kir ku ew wekî Dayikên Aştiyê dixwazin demildest ev şer bisekine û aştî pêk bê. Saîde Ûlûganayê destnîşan kir ku bila dayîk êdî negirîn û zarokên xwe nespêrine axê û got: “Em ji bo ku aştî pêk were çûn meclîsê. Divê ev hewildanên me neyên paşguhkirin û aştî pêk were. PKKê tişta ku hewce bû kir vêca divê Baxçelî û hikûmet li ser gotinên xwe bimînin. Hişmendiya DAIŞê bêrêziyê bi meytên me jî dike. Lê bila dilê herkesî rehet be, Kobanê dê tucar nekeve.”
‘Kiryarên hovane yên li Rojava bibînin’
Parlementer Gulderen Varli jî axivî û diyar kir ku Rojava ne bi tenê ye û Rojava rûmeta Kudan e. Gulderen Varli bi bîr xist ku ew dê her tim û li her derê xwedî li Rojava derbikevin û ev tişt anî ziman: “Em îro li Erdîşê ne ku berî 95 salan komkujiya Zîlanê lê hatiye kirin. Çawa ku wê demê em li vir bûn, îro jî em li vir in. Tu kes nikare serî li me bitewîne. Em ê rizgariya Rojava jî bi hev re bibînin. We bav û kalên me jî qetil kirin û em îro li ser axa wan bangî we dikin; destên xwe yên qirêj nedin Rojava. Bila dinya kiryarên hovane yên li Rojava têne kirin bibîne.”
Çalakî bi berzkirina dirûşmeyan bi dawî bû.
