Amed – Endamê Rêxistina Mafên Mirovan a Efrîn-Sûriyeyê Îbrahîm Şêxo bal kişand ser êrişên taxên Şêxmeqsûd û Eşrefiyeyê yên Helebê û wiha Got: “Êrişî nexweşxaneyan kirin û sûcên şer kirin. Tirkiye jî li kêlaka wan bû.”
Di 6ê Çilê de Çeteyên HTŞ û SMOyê êrişî taxên Şêxmeqsud û Eşrefiye yên Helebê kirin. Di êrişan de gelek sivîl hatin qetilkirin û sedhezaran jî hatin koçberkirin. Endamê Rêxistina Mafên Mirovan a Efrîn û Sûriyeyê Îbrahîm Şêxo bertek nîşanî binpêkirina mafê mirovan ên hatine pêkanîn da û derheqê êrişan ji ajansa me re axivî.
‘Gelek kes bi awayê hovane hatin kuştin’
Îbrahîm Şêxo diyar kir ku di 6ê meha Çileyê de bi piştgiriya dewleta Tirk, Çeteyên HTŞ û SMOyê bi tanq û topan ve êrişî taxên Şêxmeqsud û Eşrefiyê kirin û got: “Di van êrişên hovane de de gelek kes bi hovane hatin kuştin û bi sedan kes jî birîndar bûn. Ev şer li dijî mirovahiyê ye û sucê şer e. Çi qanunan nas nakirin, êrîşî nexweşxaneyan kirin û ev yek dijî mirovahiyê sûc e. Qanunên mafên mirovan jî pêk binpê dikin.”
‘Rêxistinên mafan erkên xwe pêk neanîn’
Îbrahîm Şêxo diyar kir ku wan binpêkirinan belge kirine û derbarê pêvajoya şopondina daraza van binpêkirinan wiha axivî: “Em wek saziyên mafên mirovan, binpêkirinan belge dikin. Daxwaza me ew e ku binpêkirin bisekinin. Em van belgeya dişinin komiteya lêpirsînê yên saziyên navdewletî da ku li ser van binpêkirinan bisekînin. Em dixwazin şer û pevçûn bisekinin. Em dizanin komiteya lêpirsînê ya rêxistina mafên mirovan, erkê xwe ev 14 sal in bi cîh neanî. Ji ber ku denge cengê li vir bilind dibe.”
‘Çete bi Tirkî diaxivîn’
Di berdewama axaftina xwe de Îbrahîm Şêxo destnîşan kir ku li taxên Şêxmeqsud û Eşrefiyê û beriya wê jî li Efrîn, Serêkaniyê û Girê Spî sûcên şer ên û sûcên li dijî mirovahiyê pêk hatin û wiha dirêjî da axaftina xwe: “Çete bi zimanê Tirkî diaxivîn. Herwiha çekdarên wan jî bi navê rojnamevan, dîmenan belav dikin. Wek dagirkeriya dewleta Tirkiyeyê ya li Efrîn û Serêkaniyê, dixwazin bajarê Helebê jî di bin kontrola Dewleta Tirk de be. Tirkiye ji xwe alikariya wan kir û bi 42 hezar çeteyên biyanî êriş kirin. Dewleta Tirkiyeyê jî wek fermî li kêleka wan sekinî.”
‘Bila sucdar werin darizandin’
Di dawiya axaftina xwe de Îbrahîm Şêxo diyar kir ku çeteyên girêdayî Tirkiyeyê li ser axa Suriyeyê erişî sivîlan dikin û wiha derbirî: “Ev wek dagirkerî tê pênasekirin. Em dîsa jî dibêjin saziyên navdewletî bil abi erkên xwe rabin û parastina gelê Kurd û gelên li Suriyeyê bikin. Lazim e derbasî Suriyeyê bibin, bila şahidiya sucên li dijî mirovahiyê diqewimin bikin, van sûcan belge bikin da ku ev sucdar hemû werin darizandin.”
