Hevserokê Federasyona Lêkolînên Îslamî ya Mezopotamyayê Abdullah Sagir diyar kir ku Rêberê Gelê Kurd Abdullah Ocalan îro pêvajoyekî daye destpêkirin û got: “Divê em hem ji aliyê olî ve hem jî ji her aliyî ve piştgiriyê bidin pêvajoyê û xwedî derkevin. Divê em Serokê xwe bi tenê nehêlin.”
Federasyona Lêkolînên Îslamî ya Mezopotamyayê bi dirûşma “Ji îslama demokratîk ber bi aştî û civaka demokratîk ve” Kongreya xwe ya Asayî ya 1emîn di 25ê Kanûnê de li Çand Amedê ya li navçeya Yenîşehîr a Amedê li dar xist. Di kongreya Federasyona Lêkolînên Îslamî ya Mezopotamyayê de Abdullah Sagir û Perva Înal weke hevserokên federasyonê hatin hilbijartin.
Fedarasyonê li bajarên wek; Amed, Batman, Mûş, Wan, Gever, Stenbol, Îzmîr û Mêrsînê şaxê xwe ava kir. Dê li Sêrt, Tatwan, Agirî û Mêrdînê jî dê şaxên federasyonê bên avakirin.
Hevserokê Federasyonê Abdullah Sagir têkildarî pêvajoyê Ajansa Welat re axivî.
‘Divê em xwedî li pêvajoyê û Serokê xwe derkevin’
Abdullah Sagir anî ziman ku ji ber ew li dijî dagirkirina Efrinê sekiniye û ji bona wê jî ew ji miftutiyê hatiye îxrackirin û wiha got: “Tirkiyê zilmê li gelê Kurd dike, dema ku leşkerên Tirk êrişî Efrînê kir, min jî wan rexne kir. Piştî rexneyê, min îxrac kirin. Doza Kurd û Kurdistanê dê ser bikeve. Em di ve rêyê de li cem gelê xwe bin. Ez serbilindim ku li cem gelê xwe sekinîme. Ola ku em pê ve girêdayîne Îslam e, jixwe Îslam di nava xwe de aştiyê dihewîne. Serokê gelê Kurd Abdullah Ocalan îro pêvajoyek daye destpêkirin. Divê jî çi destê me bê hem ji aliyê olî hem jî ji her aliyî ve em bikin û piştgiriyê bidin pêvajoyê. Lê em dizanin ku bi gotinan aştî pêk nayê. Ji bo wê divê di serî de em aştiyê di nava xwe de pêk bînin. Gelê xwe rêxistin bikin ji bo ku pêvajo bigîhije armancê. Em tenê bibêjin ‘em aştiyê dixwazin’ nabe, bi xwestinê aştî pêk nayê. Bi rêxistinkirinê dê aştî pêk werê. Ev pêvajo gelek girîng e, ji bo wê divê em xwedî li pêvajoyê derkevin û Serokê xwe tenê nehêlin. Bi kesekî ev pêvajo nagihîje armancê.”
‘Gelê Kurd amade ye divê gelê Tirk jî amade be’
Abdullah Sagir destnîşan kir ku ew ê ji bo gel li ser ola rastî bixebitin û got: “Em ê ji bo ola rastî bê dîtin bixebitin lê ji bo vê hewceyî bi demê heye Di her aliyan de em ê xebatên xwe bimeşînin. Mitîng, konferans û panelan em ê li dar bixin û bi gelê xwe re werin gel hev. Em gelê xwe tenê nehêlin. Lê ne tenê bi gelê Kurd re divê em bi gelê Tirk re jî em werin gel hev. Gelê me ji xwe ji aştiyê re amade ye. Divê gelê Tirk jî amade bibe.”
‘Ji bo aştiyek mayînde em ê bixebitin’
Abdullah Sagir diyar kir ku ji bo pêvajoyê wan heta îro 7 panel li dar xistiye û axaftina xwe wiha bi dawî kir: “Li ser mijarên aştî, ziman û civaka demokratîk de me civînan li dar xist. Me di civînan de wateya ‘aştiyê’ anî ziman. Piştî niha jî em ê mal bi mal xebatan pêk bînin. Gelê me tu carî me tenê nehiştiye. Em dixwazin xebatên xwe pêk bînin û bi ser bikevin. Em ji xwe bawer in. Olekî rast ya ku dad û wekheviyê di nava xwe de dihewîne em ê ava bikin. Ji bo aştiyek mayînde em ê bixebitin.”
