Artêşa Îsraîlê operasyonên xwe yên di hundirê Sûriyê de berdewam dike. Li gorî çapemeniya Cihûyan artêşê serê sibê li Çiyayê Hermonê operasyona ewlehiyê pêkanî.
Di demeke ku Hikûmeta Demkî ya Sûriyeyê bi boneya têkçûna rejîma Baasê pîrozbahiyan li dardixe de, Îsraîl jî mûdahaleyên xwe yên li Başûr Rojavayê Sûriyê berdewam dike. Li gorî nûçeya Î24Newsê Hêzên Parastinê yên Îsraîlê îro di seatên sibê de li Çiyayê Hermonê yê dikeve hindava Şamê operasyona ewlehiyê pêk anî. Televîzyonê diyar kir ku Tûgaya Çiya ya 810an di operasyonê de cih girtiye û cih da dîmenên operasyonê.
Bicihkirina yekîneyan didome
Di nûçeyê de hate daxuyandin ku rejîma Sûriyeyê metirsiyên Îsraîlê yên ewlehiyê li ber çavan nagire û ev yek jî dibe sedema zêdebûna gengaşiya di navbera Îsraîl û Sûriyê de. Her wiha di nûçeyê de hate ragihandin ku bicihkirina yekîneyan a ji aliyê Îsraîlê ve li herêmê berdewam dike û heta ku metirsiyên ewlehiyê yên Îsraîlê bidomin, dê serweriya artêşê ya li herêmê berdewam bike.
