Hevşaredarên Cizîrê ku xwestin beşdarî Sempozyûma Melayê Cizîrê bibin, polîsan ew asteng kirin û li wan dan.
Hevşaredarên Cizîrê Guler Tûnç û Abdûrrahîm Dûrmûş dema ku xwestin tev li Sempozyûma Melayê Cizîrê ku Serokê PDKê Mesud Barzanî jî beşdar bûbû bibin, ji aliyê polîsan ve hatin astengkirin. Li ser astengkirina polîsan hevşaredaran bertek nîşan dan.
Piştî berteka hevşaredaran, Amirê Buroya Ewlehiyê ya Emniyeta Şirnexê Şuayip Ogdur, gef li hevşaredaran xwar û ji Guler Tûnç re got, “Ev çalakiya te ya dawiyê ye.” Piştî ku midûrê polîsan gef xwar, polîsan êrişî hevşaredaran kir û li wan dan. Hevşaredar ji otela sempozyûm lê tê lidarxistin hatin dûrxistin.
Her wiha kesên ku ji bo pêşwazîkirina Mesud Barzanî hatibûn Deriyê Sînor ê Xabûrê jî ji aliyê polîsan ve hatin astengkirin û polîsan êrişî girseyê kir.
