Amed – Hevberdevkê Însîyatîfa Yekîtiya Demokratîk Mehmet Kamaç diyar kir ku vekişandina gerîlayan a ji Zapê ji bo riskên şer ji holê rake pêk hat û got: “Divê dewlet li hemberî gavên PKKê gav biavêje. Heke komîsyon bi birêz Ocalan re hevdîtinê pêk bîne dê pêvajo li pêş bikeve.”
Rêveberiya Tevgera Azadiya Kurdistanê daxuyaniyek da û ragihand ku di 16ê Mijdarê de hêzên gerîla yên li herêma Zapê ku rîska şer hebû, vekişiyane qadên guncavtir. Hevberdevbekê Înîsiyatîfa Yekîtiya Demokratîk û Parlamenterê DEM Partiyê yê Amedê Mehmet Kamaç têkildarî vekişîna gerîlayan a ji Zapê û li ser pêvajoyê ji Ajansa Welat re axivî.
‘Vekişîna ji Zapê pêşiya provokasyonan digre’
Mehmet Kamaç da zanîn ku Tevgera Azadiya Kurdistanê her tim pêşî li provokasyonan girtiye û wiha axivî : “Îro hat ragihandin ku PKKê hêzên xwe ji herêma Zapê vekişandiye. Armanca vekişandina li Zapê ew e ku pêşiya provokasyonan were girtin e. Gavên ku hata niha PKKê avêtine gelek girîng in. Lê dewleta Tirkiyeyê heta îro tu gav neavêtiye. Ev sekna dewletê derfetan dide yên ku dixwazin pêşiya pêvajoyê bigrin. Lê dîsa jî îro me dît ku gavên PKK wan derfetan holê radike. Em dibînin ku ji bo aştiyê heta îro tenê PKKê yekalî gav avêtine. Ev gavên hatine avêtin nîşan dide ku Tevgera Azadiya Kurdistanê dilrast nêzî pêvajoyê dibe. Divê demildest dijî gavên PKKê desthilatdar û dewleta Tirkiyeyê jî gavan bavêje. Divê rêya siyaseta demokratîk were vekirin. Gelê Kurd jî li bendê ye ku komîsyon bi birêz Abdullah Ocalan re hevdîtinê bike.”
‘Hevdîtin ji bo pêvajoyê gelek girîng e’
Mehmet Kamaç diyar kir ku Komîsyona Demokrasî Xwişk- Biratî û Hevgirtina Millî dê bicivê û divê biryara çûyîna Îmraliyê were dayîn û wiha pê de çû: “Heta niha komîsyonê gelek hevdîtin pêk anîn ji bo aştî û civaka demokratîk. Birêz Abdullah Ocalan di vê pêvajoyê de aktorê herî sereke ye. Divê komisyon bê metirsî biryara hevdîtina bi Birêz Abdullah Ocalan re bigre û hêvdîtinê pêk bîne. Em bawerin ku dê ev biryar were girtin û komîsyon dê bi birêz Abdullah Ocalan re hevdîtinê pêk bîne. Ev hevdîtin ji bo pêşxistina pêvajoyê gelek girîng e.”
‘Bi gotinan aştî pêk nayê’
Mehmet Kamaç destnîşan kir ku aliyek gav davêje lê aliyê din jî qels tevdigere û axaftina xwe wiha bi dawî kir: “Heke gav neyên avêtin bi gotinan aştî pêk nayê. Gelê Kurd biguman nêzî pêvajoyê dibe ji ber ku di pêvajoyên berê de fêrî tecrubeyan bû. Daxwazên gelê Kurd hene. Ev daxwaz jî nasîna nasname, ziman, çand û dîroka gelê Kurd e. Daxwaza herî mezin jî rastkirina rewşa birêz Abdullah Ocalan û azadiya wî ye. Divê ev daxwaz were cîh, ji bo ku birêz Abdullah Ocalan di vê pêvajoyê de rol û mîsyona xwe serkeftî pêk bîne.”
