Amed – Xizmên Windayan û rêveberên ÎHDa Amedê di hefteya 829emîn de li aqûbeta Mehmet Ozdemîr hat pirsîn. Di çalakiyê de hat xwestin ku faîlên Mehmet Ozdemîr û Komkujiya Roboskî werin darizandin.
Xizmên Windayan û rêveberên Komeleya Mafên Mirovan (ÎHD) a Şaxa Amedê di hefteya 829emîn de li ber Bîrdariya Mafên Mirovan a li Parka Koşûyolû çalakiya “Bila winda bên dîtin û faîl bên darizandin” li dar xistin. Malbatên windayan û rêveberên ÎHDê tev li çalakiyê bûn û wêneyên windayan hildan. Pankarta wêneyên winda li ser li erdê hat raxistin.
Vê hefteyê serpêhatiya windakirina Mehmet Ozdemîr 26ê Kanûna 1997an de li gundê Haragê yê bi ser navçeya Licê ya Amedê ve hat xwendin û li aqûbeta wî hat pirsîn. Hat zanîn ku ji roja Mehmet Ozdemîr hatiye windakirin ve tu agahî jê nehatiye girtin. Tevî hemû hewldanên malbatê jî tu encam bi dest nexistine.
Xwest faîlên Roboskî werin darizandin
Destpêkê Sekreterê ÎHDa Amedê Omer Saman axivî û got ku 829 hefte ne ji bo winda bên dîtin têkoşîna edaletê didomînin. Omer Saman bi bîr xist ku îro salvegera 13emîn a Komkujiya Roboskî ye, ew carek din komkujiyê şermezar dikin û ew qurbaniyan bi bîr tînin. Omer Saman diyar kir ku ew dixwazin demildest faîlên komkujiyê werin darizandin û edalet ji bo malbatên Roboskî pêk were.
‘Zilm qet neguherî’
Piştre keça winda Mehmet Ozdemîr, Seyhan Ozdemîr axivî û wiha got: “Di serî de ewqas sal in; di her şert û mercî de kesên ku windahiyên xwe digerin bi taybetî Dayîkên Şemiyê silav dikim.
Welatekî bi fikirin, hemwelatiyên xwe bê huqûq binçav dike bi hovane dikuje û ji holê radike. Kesên ku windahiyên xwe û li pey wê heqîqetê dikeve li meydanan bi zilm li wan tê kirin û tên binçavkirin û diavêjin zindanan. Êş dibe duqatî. Em yên ku li vê meydanê bav, bira, xuşk, zarokên xwe winda kirin e; Kesên li vê meydanê li windahiyên xwe digerin guherîn. Lê du tişt neguherîn zilma ku dewletê kiriye û dike neguheriye a din windahiyên me hîn jî li holê tune ne.
Bavê min, yanî Mehmet Ozdemir jî yek ji wan kesên ku hatiye revandin û di binçavan de hatiye kuştin e. Ne bavê min hate dîtin ne jî kujerên bavê min. Belê bila baş bê zanîn ku hewldan û têkoşîna me ya Dayîkên Şemiyê wê her berdewam bike.”
Piştre endamê Komîsyona Windayan a ÎHDa Amedê Firat Akdenîz serpêhatiya windakirina Mehmet Ozdemîr xwend.
Bi du daxuyaniyê re ji bo bîranîna Mehmet Ozdemîr û hemû windayan çalakiya rûniştinê hat lidarxistin.
