Konferansa 4emîn a Yekitiya Ragihandina Jin bi beşdariya 150 delegeyan dest pê kir. Di konferansê de dê rewşa rêxistinî û rêzikname bên nîqaşkirin û meclîs bê hilbijartin.
Yekitiya Ragihandina Jin (YRJ) konferansa xwe ya 4emîn, bi dirûşma “Bi mezinkirina YRJê em ê nibin dengê şoreşa jinê” li dar dixe. Konferans li hola Zanîngeha Rojava ya li bajarê Qamişlo yê kantona Cizîrê ya Bakur û Rojhilatê Sûriyeyê tê lidarxistin.
Di hola konferansê de wêneyên Rêberê Gelê Kurd Abdullah Ocalan hatin danîn. Her wiha ekranek li pişt dîwanê hat danîn û wêneyên şehîdên ragihandinê û pêşengên têkoşîna jinan; Gurbetellî Ersoz, Sakîne Cansiz, Denîz Firat, Cîhan Bîlgîn, Axîn Amûdê, Eylûl Nûrhilat, Arîn Cûdî, Agirî Yilmaz, Nûjiyan Erhan, Gulistan Tara, Dilovan Gever, Hêro Bahadîn, Şîlan Botan, Şîlan Ezgî, Rosîda Mardîn, Rohenda Xemgîn, Şevîn Bîngol, Roza Rênas Amed, Şîlan Baqî, Sarya Onur, Şaristan Asmîn, Dilîşan Îbîş, Koçerîn Rojîn, Avrîn Mahsûm tên nîqaşdan.
Peyama Abdullah Ocalan a “Erka me tevan e ku em bîranîna Gurbetelliyê zindî bihêlin, raman û têkoşîna wê ji nifşên sibrojê re veguhêzin. Îro ez careke din wê bi rêz, bêrîkirin û hestret bi bîr tîmim. Ronahiya wê rêya çapemeniya azad ronî dike” ku di 8’ê Cotmehê de ji Xelatên Gurbetellî Ersoz re şandibû, hat danîn.
Li gel 150 delegeyan, hevseroka Daîreya Têkiliyên Derve ya Rêveberiya Xweser Îlham Ehmed, nivîskarên jin, nûnerên Kongra Star, nûnerên dezgehên jinan ên Rêveberiya Xweser, Meclisa Sûriyeya Demokratîk (MSD), TEV-DEMê beşdarî konferansê bûne.
Konferansê bi deqeyeke rêzgirtina ji bo giyanê şehîdan dest pê kir û piştre berdevka YRJê Arîn Siwêd axaftina vekirinê kir û bixêrhatina beşdaran kir.
‘Em bi keda cnagoriyên xwe gihîştin van rojan’
Arîn Siwêd cangoriyên têkoşîna azadiyê û rojnamevanên şehîd bi bîr anîn û got: “Diviyabû du salan carekê konferans bihata çêkirin, lê ji ber rewşa herêmê û şerê li Sûriyeyê me nekarî çêkin. Îro li herêmê û Sûriyeyê qirkirinek heye, bi taybet li dijî nasnameya jinan. Ji ber wê jî girîngiya avabûna YRJê careke din xwe îspat dike. Ji ber wê jî me rêxistineke wiha ava kir. Îro êrişên li ser jinên Elewî û Durzî me wek YRJ bi wêrekî nîşan dan. Îro nasnameya me ne tenê rojnamegerî ye, nasnameya me jin e. Îro pêvajoya aştiyê jî jin dikarin pêşengiya wê bikin û bibin dengê wê. Ez dixwazim şehîdên me yên jin bi bîr bînim. Ji ber ku em bi keda wan gihaştine van rojan. YRJê bi 50 jinên rojnamevan dest pê kir, îro ji 500 endaman zêdetir hene. Em her ku diçin mezin dibin, em ê li ser soza xwe ya Jin, Jiyan, Azadî bimînin.”
Piştî axaftina vekirinê ji bo rêvebirina konferansê dîwanek ji 5 kesan hat hilbijartin.
Dê li ser xebatên YRJê sînevîzyon bê pêşandan, li ser navê Rêveberiya Xweser û Kongra Star axaftin bê kirin, rapora xebatên 4 salan bê xwendin, rewşa rêxistinî û rêzikname bên nîqaşkirin, meclîs bê hilbijartin û bi daxuyaniyekê bi dawî bibe.
Ragihandina Jinên Bakur û Rojhilatê Sûriyeyê, di 28ê Hezîrana 2020an de bi beşdariya 86 delegeyan konferansa xwe ya sêyemîn li dar xist û avakirina YRJê ragihand. Niha 557 rojnamegerên jin endamên YRJê ne. Li gorî rêziknameya YRJê her du salan carekê konferans pêk tê, lê ji ber rewşa ewlehî û êrişên li ser herêmê ev 4 sal e konferans pêk nehatiye.
